Аёдати ниёзмандон

Дастгирии ниёзмандон аз ҳадафҳои стратегии сиёсати иҷтимоии Ҳукумати Ҷумҳурии Тоҷикистон маҳсуб меёбад. Хайру сахо, некию накукорӣ, дасти мадад дароз кардан ба ниёзмандон, аёдати калонсолону беморон ва дастгирии ятимон  аз азал дар адабиёти мо талқиншуда, ин амалҳо аз накутарин ва оини ҷавонмардӣ хонда мешавад. Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ  Раҳмон ҳамеша дар суҳбату мулоқотҳо, суханрониҳо дастгирии табақаи ниёзманд, эҳсонкорию саховатмандӣ ҳидоят медиҳанд.

Вобаста ба  иҷрои дастуру супоришҳои Роҳбари давлат ва тақвият бахшидани ҳифзи иҷтимоии ниёзмандон бо иқдоми раиси вилояти Хатлон Ҳакимзода Қурбон амали неке роҳандозӣ шудааст. Бо қарори раиси вилояти Хатлон рӯзҳои шанбе Рӯзи аёдати ниёзмандон эълон гардидааст. Раисони шаҳру навоҳии вилоят, роҳбарони ташкилоту муассисаҳои вилоятӣ ва минтақавӣ вазифадор карда шудаанд, ки ҳар ҳафта ба аёдати пирони барҷомонда, меҳтарониҶВБ ва меҳнат ва дигар ниёзмандон раванд.

Қурбон Ҳакимзода, раиси вилояти Хатлон зимни сафарҳои корӣ ба шаҳру навоҳии вилоят нахуст ба аёдати меҳтарони ҶБВ, собиқадорони меҳнат рафта, бо эшон суҳбату мулоқот анҷом медиҳанд. Чунин дидорбинӣ аз ҷониби роҳбарияти мақомоти иҷроияи ҳокимияти давлатии вилояти Хатлон қариб, ки дар ҳамаи шаҳру навоҳии вилоят ба вуқӯъ пайваста, дар баробари ҳолу аҳволпурсӣ кумакҳои яквақтаина расонида шудааст.

Роҳандозӣ намудани чунин ташаббуси наҷибро раиси вилоят аз амалҳои саривақтӣ, инсондӯстона ва ҳидоятҳои Роҳбари давлат арзёбӣ мекунад. Тавре  гуфта шуд, ин табақаи ҷомеа ниёз ба таваҷҷуҳ, меҳру муҳаббати инсонӣ доранд. Як сухани хуб, ҳалли мушкилот ва дастгирии онҳо эшонро ба зиндагӣ дилгарм, рӯҳбаланд ва нерую дармон мебахшад. Рисолати мо–инсонҳо низ ҳамин аст, ки дастеро бигирем, амали некеро анҷом диҳем…

«Сафо»