БОХТАР. РОҲҲОИ ШАҲР ТАЪМИР МЕШАВАНД

Бо ташаббуси Ҳукумати Ҷумҳурии Тоҷикистон ва маблағгузории Ҷумҳурии мардумии Чин 26,2 километр роҳ ва шаш пули маркази маъмурии вилояти Хатлон-шаҳри Бохтар бо харҷи беш аз 102 миллион сомонӣ таъмир карда мешаванд.
Тибқи иттилои сардори Муассисаи давлатии истифодабарандагони роҳҳои шаҳри Бохтар Турдиназар Арзиқулов иқдоми мазкур дар се марҳила роҳандозӣ карда мешавад.
Номбурда қайд кард, ки аллакай ду марҳилаи он ба охир расида, дар марҳилаи сеюм корҳои сохтмонӣ идома доранд.
-Дар марҳилаи якум 6,3 километр роҳ ва ду пул бо маблағи 21 миллиону 784 ҳазор сомонӣ ва дар марҳилаи дуюм 7,3 километр роҳ ва ду пул бо харҷи 22 миллиону 680 ҳазор сомонӣ таъмири асосӣ карда шуданд. Айни ҳол марҳилаи сеюм идома дорад ва дар нақша аст, ки дар ин марҳила 12,6 километр роҳ ва ду пули дигар бо масрафи 58,8 миллион сомонӣ аз таъмир бароварда шаванд. То имрӯз аз ҳисоби марҳилаи сеюм 5,1 километр роҳ мумфарш гардида, корҳои боқимонда тибқи нақша рафта истодаанд,- гуфт Турдиназар Арзиқулов.
                        Сулаймон СУЛТОНОВ