ХАТЛОН. МОҲИПАРВАРӢ ДАР МЕҲВАРИ ТАВАҶҶУҲ

Бо иқдоми масъулини ҶСК парваришгоҳи “Моҳии хушзот”– и ноҳияи Абдураҳмони Ҷомӣ ва Ассотсиатсияи моҳипарварони вилояти Хатлон дар обанбори Сарбанди шаҳри Левакант 100 ҳазор моҳичаҳо сар дода шуд.
Тавре мудири бахши ҳифзи муҳити зисти ноҳияи Абдураҳмони Ҷомӣ Самадзода Шоҳрух иттилоъ дод, бо ҷорӣ гардидани сабукиҳои андоз масъулини парваришгоҳи “Моҳии хушзот”–и ноҳияи Абдураҳмони Ҷомӣ аз ҳисоби фоидаи соф ин иқдоми некро амалӣ намуданд. Ин ташаббус бори аввал набуда, ҷиҳати афзун намудани ҳаҷми истеҳсоли маҳсулоти парҳезӣ ҳамасола ба роҳ монда мешавад.
Ба иттилои масъулини ҶСК парваришгоҳи “Моҳии хушзот”–и ноҳияи Абдураҳмони Ҷомӣ дар хоҷагӣ 52 мутахассиси чашмикордон дар масоҳати 694 гектар кулҳо ба парвариши се намуди моҳӣ аз қабили амури сафед, пешонағафс ва зағорамоҳӣ машғул мебошанд.
Соли гузашта дурнамои истеҳсолии хоҷагӣ 300 тонна моҳӣ пешбинӣ гардида буд. Вале хоҷагидорон тавонистанд ин нишондодро як баробар зиёд таъмин намоянд. Хоҷагидорон соли ҷорӣ низ ният доранд истеҳсоли моҳиро ба маротиб зиёд карда, саҳми арзандаи хешро дар таъмини аҳолӣ бо ғизои парҳезӣ гузоранд.
Феълан дар вилояти Хатлон 253 хоҷагиҳои моҳипарварӣ дар масоҳати 2 ҳазору 147 гектар кулу ҳавзҳо ба парвариши моҳӣ машғул мебошанд.
                                                                 Сулаймон СУЛТОНОВ