КОМЁБИИ ХОНАНДАГОНИ ХАТЛОНӢ
Ҳамчунин дар вилояти Хатлон 3 нафар толибилмон- Аниса Сатторзода, Рамзия Саъдуллоева аз гимназияи „Боғи Ҳабиб“-и ноҳияи Муъминобод ва Фурқат Давлатмуродзода, хатмкардаи литсейи давлатии № 1-иноҳияи Мир Сайид Алии Ҳамадонӣ ба гирифтани медали тилло комёб гаштанд. Гуфта мешавад, ки тайи чанд соли охир мактаббачагони хатлонӣ ба гирифтани медали тилло мушарраф нагардида буданд.
Раиси вилояти Хатлон Қурбон Ҳакимзода зимни баромади худ дар ҷаласаи машварати августии омӯзгорони вилоят аз бурду бохти маорифчиёни вилоят ёдовар гардида, ҷиҳати баланд бардоштани сатҳу сифати дониши хонандагон, шароити таълиму тадрис дар муассисаҳои таълимии вилоят, таъмини сару либоси мактаббачагон ва ғайра андешаронӣ намуд.
Зикр гардид, ки маориф ҳамчун соҳаи афзалиятнок дар сиёсати Асосгузори сулҳу ваҳдати миллӣ- Пешвои миллат қарор дорад ва маблағгузорӣ ба соҳаи маорифи кишвар сол то сол зиёд мегардад. Дар доираи омодагиҳо ба истиқболи ҷашни бузурги миллат 30- солагии Истиқлолияти давлатӣ иншоотҳои зиёди соҳаи маориф ба нақша гирифта шудааст.
Вобаста ба дастовардҳои толибилмон Қурбон Ҳакимзода зикр намуд, ки минбаъд шогирдон, омӯзгорон ва муассисаҳои таълимӣ, ки дастовардҳои назаррас доранд, аз ҷониби мақомоти иҷроияи ҳокимияти давлатии вилояти Хатлон ҳавасманд карда мешаванд. Аз ҷумла, гирандагони медали тилло- 10 ҳазор сомонӣ, омӯзгор- 5 ҳазор ва муассисаи таълимие, ки шогирдонаш медали тилло мегиранд, бо 3 ҳазор сомонӣ сарфароз карда мешаванд.
Дар ин рӯз ба омӯзгорони пешқадаму фаъол, ки дар рушди соҳаи маориф саҳми арзанда доранд, ифтихорнома ва туҳфаҳо тақдим гардид.
“САФО”