Кишти пумбадона вусъат меёбад

-Бе тухмии хушсифат, техникаи кишоварзӣ, тавсияи мутахассисону олимон, риояи меъёрҳои кишти пумбадона, фосилаи кишт мо ба ҳадафи комил расида наметавонем,- зикр намуд муовини сардори Раёсати кишоварзии ноҳияи Вахш Қаюм Олимов.

    Хоҷагии тухмипарварӣ – зотпарварии «Кӯлоб» - и ноҳияи Вахш яке аз калонтарин хоҷагиҳои кишоварзии ноҳия маҳсуб ёфта, дорои 1 ҳазору 350 гектар замини умумӣ буда, аз панҷ шуъба ва 22 бригадаи пахтакорӣ иборат аст. Соли равон кишоварзон азм доранд, ки дар майдони 1 ҳазору 150 гектар  кишти пахтаи миёнанахи «тобонӣ» ва маҳинахи 93 – 26 – в –ро то 15 – уми апрел хушсифат анҷом бахшанд.

  Дар хоҷагии тухмипарварӣ–зотпарварии ноҳияи Вахш техника дар хати омодабош қарор дошта, меъёрҳои кишти пумбадона қатъӣ риоя мегардад, кишоварзон ва механизаторон қадршиносӣ мешаванд.

   Аз тухмиҳои хушсифати   навъҳои «тобонӣ» ва 93 – 26 – в- навъи пурқиммати пахтаи маҳиннах самаранок истифода бурда мешавад. Хољҷагидорон азми комил доранд, ки дар майдони 300 гектар кишти пахтаи пурқиммати маҳиннах гузаронида, дигар ноҳияҳоро низ бо ин навъҳои пумбадонаи хушсифат таъмин намоянд. То имрӯз аз ноҳияҳои Мир Сайид Алии Ҳамадонӣ, Абдураҳмони Ҷомӣ, Шаҳритус, Қубодиён, Кӯшониён, Вахш ва ноҳияи Деваштичи вилояти Суғд аз хоҷагии тухмипарварии «Кӯлоб» беҳтарин навъҳои зикргардидаи тухмиҳои хушсифати пумбадонаро харидорӣ намуданд.

  Таҷрибаи деҳқонони асили хоҷагии тухмипарварӣ – зотпарварии ноҳияи Вахш дар вилояти Хатлон ҳамчун мактаби таҷрибаи пешқадам эътироф шудааст. Аз ҳисоби даромади хуби иқтисодӣ хоҷагидорон дар доираи истиқболи арзанда аз 30 – солагии Истиқлолияти давлатии Ҷумҳурии Тоҷикистон бунёдкорӣ ва тозакориҳои зиёдеро анҷом бахшида, бо таъмиру азнавсозии иншооти таъиноти гуногун, мумфаршкунии роҳҳо, чароғонкунӣ натанҳо ноҳияи Вахш, балки вилоятро дар миқёси ҷумҳурӣ ва берун аз он муаррифгар мебошанд.