ОЛИМОНИ ДОНИШГОҲИ БОХТАР 5 ТОННА КАРТОШКА КИШТ КАРДАНД
Омӯзгорону кормандони Донишгоҳи давлатии Бохтар ба номи Носири Хусрав дар замини хоҷагии ёрирасон ва таҷрибавии минтақаи “Зағертӣ”- 5 тонна картошка кишт карданд. Дар ин бора Маркази таҳлилӣ-иттилоотии ДДБ хабар додааст.
Бино ба иттилои манбаъ самаранок истифода бурдани замин зери таваҷҷуҳи махсус қарор гирифта, аз фарҳангу масъулияти ҳар сокини кишвар вобастагии зиёд дорад.
- Имрӯз 19-уми январи соли 2021 омӯзгорону кормандони донишгоҳ дар ин мавзеъ ҷамъ омада дар зери дарахтони боғи хоҷагӣ 5 тонна картошка кишт карданд.
Бояд қайд намуд, ки замини хоҷагии мазкур 5 гектар буда, дар 3 гектари он боғ бунёд шуда, дар он дарахтони гелосу зардолу, себу ангур, анору шафтолу ва амсоли шинонида шуда, қисми зиёди онҳо боровар мебошанд, - омадааст дар иттилоияи Маркази таҳлилӣ-иттилоотии ДДБ.
Бояд зикр кард, ки ҳайати устодону кормандони Донишгоҳи давлатии Бохтар ба номи Носири Хусрав дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмонро дар самти самараноку оқилона истифода бурдани замин ва аз он се-чор ҳосил рӯёнидан сармашқи кори худ намуда, дар ин ҷода ба натиҷаҳои назаррас ноил гардида истодаанд.
Дар ин мавзеъ ба ҳар факултаи донишгоҳ қитъаи замини махсус вобаста гардида, устодон ҳангоми фориғ аз дарс ба ин минтақа сафарбар шуда, ба кори кишоварзӣ машғул мешаванд.
«САФО»
