Бунёди аввалин бинои панҷошёна

Бо ибтикори соҳибкори маҳаллӣ Саидаҳмад Мараҷабов дар ҷамоати шаҳраки “Панҷ”-и ноҳияи дурдасти Панҷи вилояти Хатлон аввалин бинои хуштарҳу замонавии панҷ ошёна қомат афрохта истодааст.
Тавре раиси ҷамоати шаҳраки мазкур Ҷобир Ҳусейнзода зимни суҳбат иброз кард, бино бо харҷи 11 миллион сомонӣ бунёд шуда, аллакай 60 фоизи корҳои сохтмонӣ ба анҷом расидаанд. Ошёнаи якуми бино барои марказҳои савдою хизматрасонӣ бунёд хоҳад шуд. Бинои панҷошёна соли ҷорӣ дар арафаи ҷашни 30-солагии Истиқлолияти давлатии Ҷумҳурии Тоҷикистон ба истифода дода хоҳад шуд.
Ҷобир Ҳусейнзода инчунин иттилоъ дод, ки соҳибкор боз нақша дорад баъди ба истифода додани ин бино дар шафати он боз як бинои панҷошёнаи дигар бунёд намояд.
Дар умум дар ҷамоати шаҳраки “Панҷ”-и ноҳияи Панҷ бахшида ба ҷашни 30-солагии Истиқлолияти кишвар бунёди 19 иншооти таъиноташон гуногун ба нақша гирифта шудааст, ки то ин замон 12-тои он мавриди баҳрабардорӣ қарор гирифтаанд.
               Сулаймон СУЛТОНОВ