Зебоиофар

-ҳунар-

Ин намунаҳои эҷод маҳсули дасти Ҷонона Ахмедова, роҳбари маҳфили “Рассомони ҷавонон”-и Муассисаи таҳсилоти иловагии назди шуъбаи маорифи ноҳияи Ҷалолиддини Балхӣ мебошад. Санъати дастие, ки бо истифода аз коғазҳои ранга омода карда шудааст, квиллинг ном дорад ва он барои ороиши хонаву ошён ва меҳмонхонаву тарабхонаҳо истифода бурда мешавад.
Ҷонона ҳамчун омӯзгор ба кӯдакону наврасон аз санъати мусаввирӣ дарс мегӯяд. Ӯ на танҳо расмкаширо меомӯзонад, балки омодасозии ҳар гуна ашёву ангораҳои зеборо низ ба шогирдони худ ёд медиҳад. Чуноне, ки Ҷонона мегӯяд, таҳияи квиллинг заҳмати зиёд мехоҳад. Барои он пеш аз ҳама завқи баланд, сабру таҳаммул ва асаби мустаҳкам мебояд. Зеро кораш хеле майдаю нозук аст. Муаллиф ин асарҳои мусаввириашро ба Солҳои рушди деҳот, сайёҳӣ ва ҳунарҳои мардумӣ бахшида, онҳоро инъикоскунандаи зебогиҳои табиати диёр медонад.
То имрӯз Ҷонона Ахмедова беш аз 25 квиллинг таҳия намудааст. Ӯ ният дорад, ки асарҳои худро ҷамъ оварда коллексия кунад ва онро ба намоиш гузорад.
- Дар оғози кор тарҳи асарро тасвир менамоям. Баъдан бо истифода аз ашёи зарурӣ аз коғазҳои ранга гулҳоро омода мекунам. Сипас, онҳоро аз болои эскиз мечаспонам ва ниҳоят квиллинг омода мешавад, - мегӯяд ҳунарманди чирадаст Ҷонона Ахмедова.
Ин бонуи зебопараст аз хурдӣ шавқи рассомӣ дошт. Ӯ ягон мактаб ва ё курси омӯзишии махсусро нахондааст. Модараш, ки ҳунарманд аст баҳри баланд бардоштани завқи зебоипарастии духтараш расмкаширо ба Ҷонона омӯзонид.
-Бештар табиати диёрро тасвир мекунам. Ба 60 нафар аъзои маҳфили “Рассомони ҷавон” ҳунарамро меомӯзонам ва ҳамеша аз болои худ низ кор мекунам. Бо хонандагон расми рамзҳои давлатӣ ва манзараҳои дилрабои кишварамонро кашидем. Зеро онҳо бояд аз хурдӣ донанд, ки Парчами миллӣ, Нишони давлатӣ ва обу хоки Ватан муқаддас аст.
Дар муассисаҳои таҳсилоти иловагии назди шуъбаи маорифи ноҳияи Ҷалолиддини Балхӣ баҳри ғанӣ гардонидани малакаю маҳорати эҷодию техникӣ, васеъ намудани ҷаҳонбинии кӯдакону наврасон, бедорсозии майлу рағбати наврасону ҷавонон тадбирҳои амалӣ андешида шуда, 920 нафар хонандагони мактабҳои миёнаи умумӣ ба 22 маҳфили фаннӣ, эҷодӣ, касбию ҳунарӣ ва варзишӣ ҷалб карда шудаанд, ки “Рассомони ҷавон” яке аз онҳост.
                     МУҲАББАТ, н. Ҷалолиддин Балхӣ