МИНТАҚАИ КӮЛОБ: 80 КИЛОМЕТР РОҲ ТАЪМИР ШУД

Давоми ҳашт моҳи соли ҷорӣ, бо ибтикори соҳибкорони ватандӯст ва аҳолӣ зиёда аз 60 километр роҳҳои маҳаллии минтақаи Кӯлоб таъмири асосӣ шуданд, ки маблағи он беш аз 35 миллион сомониро дар бар мегирад.
Тавре зимни суҳбат сардори Муассисаи давлатии нигоҳдории роҳҳои автомобилгарди минтақаи Кӯлоб Рустам Вализода изҳор кард, бо дастгирии соҳибкорон инчунин 106 километр роҳ сангфарш гардида, се адад пул бо дарозии 24 метр ва ду қубур бо дарозии 16 метр аз таъмир бароварда шуданд.
Номбурда ҳамчунин гуфт, ки бо дастгирии Вазорати нақлиёти Ҷумҳурии Тоҷикистон бо харҷи беш аз 700 ҳазор сомонӣ 15,5 километр роҳ мумфарш карда шуд. Инчунин аз ҳисоби буҷети мақомотҳои маҳаллии ҳокимияти давлатии шаҳру ноҳияҳо бо харҷи беш аз як миллион сомонӣ роҳҳои минтақа аз таъмир бароварда шуданд.
Дар маҷмӯъ бо харҷи 38 миллиону 173 ҳазор сомонӣ 79,4 километр роҳҳои минтақаи Кӯлоб аз таъмир бароварда шудаанд, гуфт Р. Вализода.
                                    Сулаймон СУЛТОНОВ