КУМАКИ Қ. ҲАКИМЗОДА БА РОҲСОЗОНИ ЛЕВАКАНТ
Раиси вилояти Хатлон Қурбон Ҳакимзода зимни боздид аз рафти таъмиру бозсозии роҳ дар деҳаи Хуррамдеҳи шаҳри Левакант иброз доштааст, ки роҳсозонро бо 2 мошин битум дастгирӣ мекунад.
Тавре шуъбаи иттилоотию таҳлилии дастгоҳи раиси вилояти Хатлон хабар медиҳад, дар доираи нақшаи чорабиниҳо бахшида ба ҷашни 30-солагии Истиқлолияти давлатии Ҷумҳурии Тоҷикистон сокинони деҳаи Хуррамдеҳ бо ҷалби маблағҳои худӣ ва соҳибкорон тасмим гирифтанд, ки роҳи дохилидеҳавиро ба масофаи 4 км таъмиру мумфарш намоянд.
Дар кори таъмиру азнавсозии роҳ сокинони маҳал ба тариқи ҳашар ва муҳоҷирони меҳнатӣ ҳиссагузорӣ намуда, аллакай ба таври дастаҷамъӣ 2,2 км роҳ мумфарш карда шудааст.
Раиси вилоят Қурбон Ҳакимзода ба ҳамаи дастандаркорон, соҳибкорони деҳа барои амалисозии ин иқдоми наҷиб изҳори миннатдорӣ намуда, дар сохтмони қисмати боқимондаи роҳ барор хостаанд.
«САФО»
