Соҳиб Раҷабов: ПАНДЕМИЯ БА ИҶРОИШИ НАҚШАИ АНДОЗ ЗАРБА ЗАД

- Паҳн шудани бемории сироятии нави коронавирус на танҳо ба саломатии инсон, балки таъсири худро ба иқтисодиёти кишвар низ расонида истодааст. Ин ҳам бошад, коҳиш ёфтани хизматрасониҳо дар ширкатҳои сайёҳӣ, меҳмонхонаҳо ва дигар намуди хизматрасониҳо, фаъолият накардани аксар бозорҳо ва марказҳои калони тиҷоратӣ, коҳиш ёфтани гардиши савдои чакана, кам шудани шумораи коргарони кироя, ногувор шудани вазъи молиявии баъзе аз корхонаҳо, коҳиш ёфтани манбаъҳои андозбандӣ дар як қатор корхонаҳои калони саноатӣ таъсир расонидааст, - гуфт зимни нишасти хабарӣ Соҳиб Раҷабов сардори Рёсати андози вилояти Хатлон.

Бино ба иттилоъи манбаъ иҷрои нақшаи андозҳо ва дигар пардохтҳои ҳатмӣ бо назардошти андози иҷтимоии ғайрибуҷетӣ дар 6 моҳи соли ҷорӣ ба андозаи 100,4% таъмин гардида, ба ҷойи 708 миллиону 817,8 ҳазор сомонии пешбинишуда, ба буҷет 711 миллиону 848,0 ҳазор сомонӣ ворид карда шуд, ки ин нисбат ба маблағҳои ҳамин давраи соли гузашта ба андозаи 7,0 миллион сомонӣ бештар мебошад. 

Дар ин давра дар вилоят иҷроиши нақшаи 4 намуди андозҳо, аз ҷумла андози иҷтимоӣ аз ҳисоби корхонаҳои ғайрибуҷетӣ – 97фоиз, андоз аз истифодабарандагони роҳҳои автомобилгард 66 фоиз, низомҳои махсуси андозбандӣ 94 фоиз ва андози воситаҳои нақлиёт 75 фоиз таъмин гардиданд, ки дар натиҷа аз ин ҳисоб ба буҷет 26,1 миллион сомонӣ ворид нашуд.

Бо назардошти вазъияти имрўза ба паҳн шудани бемории ҳамагир муайян карда шуд, ки дар давраи 6 моҳи сипаришудаи соли равон нишондиҳандаҳои даромади умумии андозбандишаванда дар фаъолияти аксар соҳаҳои хоҷагии халқ ба маблағи 40 миллион сомонӣ кам гардиданд.

                                                         М. ШОИМОВА