ҶӮШУ ХУРӮШИ КОРҲОИ СОХТМОНӢ ДАР ЧОРБОҒ

Дар маҳаллаи навбунёди Чорбоғи ноҳияи Хуросон, корҳои сохтмонӣ дар манзилҳои истиқоматии сокинони аз офати табиӣ зарардида бо дилгармӣ идома дорад.
Ба иттилои сардори бахши кор бо ҷомеаи Раёсати Кумитаи ҳолатҳои фавқулода ва мудофиаи гражданӣ дар вилояти Хатлон Муродҷон Муҳиддинов, то 1 – уми июли соли ҷорӣ корҳои ҷобаҷокунӣ ва ҳамворкунӣ, кандани ҳандақҳо, рехтани таҳкурсиҳо сад дар сад ба охир расида, девори 62 хона аллакай бардошта шадааст. Ҳамчунин боми чор хона пурра пӯшида шуда, болопӯши 53 хонаи дигар бо маром идома дорад. Ба гуфти манбаъ дару тирезаҳои наздики 20 хона насб гардида, дар як хонаи дигар корҳои андовакунӣ ба охир расидааст.
Ҳамчунин иттилоъ дода шуд, ки ҳамарӯза зиёда аз 500 нафар ихтиёриён ба кӯмаки сокинони ин мавзеъ пайваста, бо хӯроки нисфирӯзӣ ва шом таъминанд. Ба хотири сиҳатии сокинон дар ин мавзеъ бунгоҳи тиббӣ ташкил шуда, мардум ба хизмати босифати шабонарӯзии тиббӣ таъминанд.
Сокинони зарардида ҳама якдилона миннатдории хешро ба Асогузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баён намуда, аз ғамхории ҳамешагии Давлат ва Ҳукумати Ҷумҳурии Тоҷикистон ва мақомоти иҷроияи маҳаллии ҳокимияти давлатии вилояти Хатлон қаноатманданд.
                                                                             Сулаймон СУЛТОНОВ