ДАСТГИРИИ ТАБИБОНИ ВИЛОЯТ

Соҳибмулкони бозори «Ҳоҷӣ Шариф» ва хонаводаи Соҳибовҳо ба 465 оилаи табибони вилояти Хатлон кумак расониданд.

Аз ҷониби соҳибмулкони бозори калонтарини шаҳри Бохтар – «Ҳоҷӣ Шариф» ва хонаводаи соҳибкорон Соҳибовҳо маводи озуқа, аз ҷумла орду равғану биринҷ ва ғайра, ба 130 оилаи табибон дар Кӯлоб, 185 табиби Беморхонаи вилоятии клиникии ба номи Бурӣ Воҳидов, 60 оила дар ноҳияи Данғара, 60 хонавода дар ноҳияи Кӯшониён, 30 оила дар ноҳияи Вахш дастрас гардид.

Бояд гуфт, ки оилаи Соҳибовҳо ҳанӯз аз давраи ба ватан баргаштани ҳамватанони мо аз кишварҳои хориҷӣ ба кумаки табибон иқдом карда буданд. Вақте беш аз 300 нафар шаҳрвандони мо аз Маскав тариқи фурудгоҳи байналминалии Кӯлоб ба ватан баргаштанду онҳоро дар беморхонаи клиникии вилояти ба номи Бӯрӣ Воҳидови шаҳри Бохтар таҳти карантин қарор доданд, оилаи Соҳибовҳо давоми 21 рӯз таъмини се вақт хӯроки онҳоро якҷоя бо 100 табиби дигар ба уҳдаи худ гирифтанд.

Ин оила дар баробари таъмини се вақт хӯроки гарм барои муҳоҷирони таҳти карантин қарор дошта, либосҳои тагпуш, маводҳои гигиенаи шахсӣ, уребча барои кӯдакон, косаю қошуқ, маводҳои антисептикӣ ва дигар лавозимоти заруриро дастрас карда буданд.
Мақомоти иҷроияи ҳокимияти давлатии вилояти Хатлон ба роҳбарияти бозори «Ҳоҷӣ Шариф» барои расонидани кумак ба 465 оилаи табибони вилоят изҳори миннатдорӣ намуд.  
                                                                               Сулаймон СУЛТОНОВ