АФЗОИШИ ИСТЕҲСОЛИ ТРАНСФОРМАТОР ДАР ХАТЛОН

   Ҷамъияти саҳҳомии кушодаи “Трансформатор”-и шаҳри Бохтар соли 2019-ум 350 трансформаторҳои гуногунтамғаро истеҳсол кардааст, ки ин нишондод нисбат ба соли 2018-ум 38 адад зиёд мебошад.

Тавре директори корхонаи мазкур Назаралӣ Давлатшоев иттилоъ дод, трансформаторҳои истеҳсолшуда айни ҳол дар ҷумҳурӣ фурӯхта мешаванд. Харидори асосии трансформаторҳо шаркати “Барқи тоҷик” ба шумор меравад. Барои истеҳсоли трансформатор қисмҳои эҳтиётӣ 80 фоиз аз Россия ва боқимонда аз Ӯзбекистону Хитой оварда мешаванд. Соли сипаригардида корхона ба маблағи зиёда аз 24 миллион маҳсулот истеҳсол кардааст, ки назар ба соли 2018-ум наздики 6 миллион сомонӣ зиёд буда, афзоиш 132,9 фоизро дар бар мегирад. Корхона бо заводи трансформаторбароии Нижний Тагили Федератсияи Россия ва ширкати “Уз нефт”-и Ӯзбекистон шартномаи ҳамкорӣ дорад.  

Номбурда ҳамчунин гуфт, ки соли равон азнавсозии корхона ва воридсозии таҷҳизоти наву замонавӣ ба нақша гирифта шудааст. Таҷҳизоти нав аз Италия ва Россия оварда мешаванд. Баъди ворид шудани таҷҳизоти нав ва насби онҳо дар корхона содироти маҳсулот ба хориҷи кишвар ба роҳ монда мешавад.