ИСТИФОДАИ ОҚИЛОНАИ ЗАМИН

Истифодаи самараноку оқилонаи замин талаботи замон буда, зимни ироаи Паём Пешвои муаззами миллат муҳтарам Эмомалӣ Раҳмон таъкид доштанд, ки аз замин се - чор ҳосил бардоштан манфиатбахш мебошад.

Татбиқи ҳадафмандонаи сиёсати Ҳукумати Ҷумҳурии Тоҷикистон, таҷдиди хоҷагиҳои кишоварзӣ, таъсиси хоҷагиҳои деҳқонӣ, инфиродӣ, кооперативҳои истеҳсолӣ ва пеш аз ҳама, дастрасии деҳқон ба замин имкони воқеӣ фароҳам овард, ки боздеҳи замин баланд гардад. Саҳмдорони хоҷагии деҳқонии «Холов Шодӣ» аз ноҳияи Абдураҳмони Ҷомӣ талаботи замонро хуб дарк карда, ҳар сол аз замин ду - се ҳосил мебардоранд. Айни ҳол дар ин хоҷагӣ, ки чун мактаби таҷрибаи пешқадам эътироф гардидааст, дар қитъаҳои алоҳида беш аз 5 ҳазор бех гулкарам нашъунамои муътадил дорад. Чун обу ҳаво гарм омад, рӯзҳои наздик деҳқонон имкон пайдо мекунанд, ки ҳосилро ба бозор бароранд.

Ҳар сол деҳқонон аз майдони 2 гектар замин ҳосили хуби помидору бодиринг, гулкараму қаламфури булғорӣ, зардолую шафтолу ба даст оварда, дар таъмини амнияти озуқаворӣ ва арзонию фаровонии бозорҳои истеъмолӣ саҳми назаррас мегузоранд. Имсол низ ба истиқболи кишту кори баҳорӣ омодагии ҷиддӣ гирифтаанд.