БУНЁДИ БЕМОРХОНАИ МИНТАҚАВӢ

   Бо ташаббуси Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо харҷи 3 миллиону 200 ҳазор сомонӣ дар деҳаи Меҳрободи Ҷамоати деҳоти “Машъал”-и ноҳияи Вахш беморхонаи замонавии минтақавӣ сохта, мавриди истифода қарор дода шудааст. 
   Ба иттилои сардухтури беморхонаи марказии ноҳияи Вахш Усмон Ҷабборов он аз 13 ҳуҷра иборат буда, бо системаи ягонаи гармидиҳӣ муҷаҳҳаз мебошад. Инчунин дар ин беморхонаи минтақавӣ анбор ва ҷойи безараргардонии сӯзандоруҳо низ бунёд гардидааст.  
   Ҳамчунин аз ҷониби Вазорати тандурустӣ ва ҳифзи иҷтимоии аҳолии кишвар ба маблағи 300 ҳазор сомонӣ барои беморхона муосиртарин таҷҳизоти тиббӣ оварда шудааст, ки ба беморон хизмати баланди тиббӣ хоҳад расонд. Дар ин баробар ба беморхонаи минтақавӣ як мошини ёрии таъҷилӣ оварда шудааст, ки дар он тамоми таҷҳизоти тиббӣ насб гардида, имкон аст, дар дохили он ҷарроҳиҳои гуногун низ гузаронида шаванд.  
Баъди ба истифода додани беморхонаи минтақавӣ акнун сокинон имкон пайдо карданд, ки роҳи дарозро тай накарда, дар ин ҷамоати деҳоти дурдаст аз ташхисҳои гуногун гузашта, бо хизмати баланди тиббӣ фаро гирифта шаванд. 
Сулаймон СУЛТОНОВ


Добавить комментарий
Маҷалаи №6-2019