РОҲҲОИ МАҲАЛЛӢ ТАЪМИР ШУДАНД

   Давоми се моҳи соли ҷорӣ аз ҷониби соҳибкорони маҳаллӣ ва шахсони саховатпеша дар ноҳияи Ҷалолиддини Балхӣ бо харҷи беш аз 1 миллиону 300 ҳазор сомонӣ 4,3 километр роҳҳои маҳаллӣ мумфарш карда шуданд. 
   Тавре сардори “Муассисаи давлатии нигоҳдории роҳҳои автомобилгард”-и ноҳияи болозикр Маҳмадшариф Салимзода зимни суҳбат иброз кард, бо дастгирии соҳибкорон 3,5 километр роҳ дар Ҷамоати деҳоти “Навобод”, 0,2 километр дар Ҷамоати шаҳраки “Балх” ва 0,6 километр дар Ҷамоати деҳоти “Узун” мумфарш гардидааст. 
   Номбурда ҳамчунин гуфт, ки бо ташаббуси соҳибкорони ватандӯст бо харҷи 15 ҳазор сомонӣ 2,1километр роҳҳои маҳаллӣ сангфарш гардида, инчунин бо харҷи 45 ҳазор сомонӣ як купрук бо дарозии 12 метр аз таъмир бароварда шуд. 
   -Ҳамзамон дар се моҳи аввали соли равон аз ҳисоби буҷети маҳаллӣ 27 ҳазору 503 сомонӣ ҷудо гардида, маблағҳои ҷудошуда дар таъмиру нигоҳдории роҳҳои маҳаллии ноҳия сарф карда шуданд, - гуфт М. Салимзода.