Паём-роҳнамои хирадмандию рушноии ҷомеа

Бо шарофати сиёсати бузурги иҷтимоиву иқтисодии Пешвои муаззами миллат дар солҳои соҳибистиқлолии Ватан, бахусус дар 10-15 соли охир, дар кишвари мо иқтидорҳои энергетикӣ бо суръат афзуда истода, дар миқёси минтақаву ҷаҳон обрӯву эътибори Тоҷикистонро ҳамчун давлати саноатии содиркунандаи неруи барқ, ба маротиб баланд гашта истодааст. 

Пайваста амалӣ гардидани иқдомҳои созандагию бундёкоронаи Пешвои миллат дар самти беҳтаргардонии ҳолати экологии муҳити зистро мо дар ҷаҳду талошҳои Президенти маҳбуби худ, аз ҷумла, дар ба кор даровардани ду агрегати НОБ-и  Роғун, ба истифода дода шудани як қатор неругоҳҳои хурди барқи обӣ, аз ҷумла НБО-и хурди “Тоҷикистон” дар ноҳияи Мурғоб, амалишавии лоиҳаи байналмилалии хати интиқоли барқи “Осиёи Миёна-Осиёи Ҷанубӣ-1000”( ОМОҶ-1000 ё CASA-1000), тармиму таҷдиди неругоҳҳои амалкунандаи барқи обии Норак, Сарбанд, Қайроқум ва дигарҳоро баръало мушоҳида менамоем. 

           Аз оғози фаъолияти худ то айни ҳол Донишкадаи энергетикии Тоҷикистон бештар аз 3240 мутахассисони болаёқати соҳаи барқро таълиму тарбия додааст, ки дар корхонаву муассисаҳои кишвар ва хориҷи он муваффақона меҳнат карда истодаанд ва ин боиси ифтихору сарфарозии коллективи донишкада мебошад. Имрӯз хатмкунандагони Донишкадаи мазкур дар корхонаҳои хурду бузург, аз ҷумла, бузургтарин иншооти энергетикии Тоҷикистон: НБО Роғун, Норак,  Сангтӯда-1, Сангтӯда-2 ва Сарбанду Бойғозӣ бо сари баланд донишҳои худро дар амал татбиқ месозанд. 

Бо кумаку дастгирии Ҳукумати ҷумҳурӣ ва роҳбарияти Вазорати энергетика ва захираҳои об ва Вазорати маориф ва илми Ҷумҳурии Тоҷикистон Донишкадаи энергетикии Тоҷикистон ба маркази аз ҷиҳати илмӣ омодасозии омӯзгорони ҷавон табдил гардидааст. Дар ин муассисаи олӣ барои таълиму тарбияи мутахассисони соҳаи барқ зиёда аз 100 нафар омӯзгорони варзида, аз ҷумла, номзадҳо ва докторони илм  фаъолият доранд.  

Ҳамчунин,  бо мақсади ба омӯзиши илмҳои риёзиву дақиқ ва табиӣ ҷалб кардани наврасону ҷавонон, олимону муҳаққиқон ва омӯзгорон ҳамасола дар донишкада ташкил ва баргузор намудани озмунҳои ҷумҳуриявии “Илм-фурӯғи маърифат “Тоҷикистон-Ватани азизи ман”, “Фурӯғи субҳи доноӣ китоб аст” ба нақша гирифта шудааст. 

Эътибори аввалиндараҷа додан ба сифати таълим, тарбияи кадрҳо, хубтар ба роҳ мондани омӯзиши забонҳои хориҷӣ ва технологияи иттиллоотӣ,  мустаҳкам намудани заминаи моддиву техникӣ, озмоишгоҳӣ ва кадрии донишкада, ҷалб ва зиёд намудани шумораи ҷавонон дар зинаи аспирантура, вусъат бахшидани корҳои илмиву тадқиқотӣ, амалӣ намудани чораҳои мушаххас ҷиҳати соҳибкасбу соҳибҳунар гардидани ҳар як ятими кулл, ки дар донишкада ба таҳсил фаро гирифта шудааст, андешидани тадбирҳо ҷиҳати рушди забони давлатӣ ва дигар иқдомҳои муҳим дар назар аст.

Бо боварии комил метавонем гуфт, ки устодони Донишкадаи энергетикии Тоҷикистон  аз уҳдаи вазифаҳои дар назди онҳо гузоштаи Пешвои муаззами миллат ва роҳбарияти Вазорати энергетика ва захираҳои об, Вазорати маориф ва илми Ҷумҳурии Тоҷикистон гузошташуда, ҷиҳати таълиму тарбия ва омодасозии мутахассисони беҳтарини соҳаи энергетика, бо сарбаландӣ мебароянд.