НАВРӮЗӢ

                   
               Наврӯзӣ
Пайки  Наврӯз омаду ҳамдам шавем,
Фориғ  аз  дарду ғами олам шавем.
Дар  набарди зиндагонӣ лаҳзае
Ҳамчу гул  бишкуфтаву хуррам шавем.
Абрҳо боронфурӯшӣ мекунанд,
То  ба барги зиндагӣ шабнам шавем.
Аз  балоҳои замину осмон,
Чун сипар андар  сари  одам  шавем.
Дар лабони мардуми хушбахти  худ,
Боз чун лабханди дигар  зам  шавем.
Баски  ин  Наврӯз эҳёгар бувад ,
Хизри наврӯзии  ин  олам шавем.

                  Чу Наврӯз омад
Сабз ҳар кӯҳу даман  гашт, чу Наврӯз омад,
Боз  гул зеби чаман  гашт, чу  Наврӯз омад.
Мурғи  илҳоми  худодод ба гардун  пар  зад,
Сафҳа пуратри  сухан  гашт,  чу Наврӯз  омад.
Боз он  ёр ҳавасбозу  тарабҷӯ  гардид,
Дили  ӯ чун  дили  ман  гашт,чу  Наврӯз омад.
Ба  тани духтари тоҷик чи хуш мезебад,
Дашт монанди  чакан  гашт, чу  Наврӯз  омад.

                Хурсандмурод ФАҚИРОВ