Мансабдорон ба ҷавобгарӣ кашида шуданд

   Тавре аз Прокуратураи вилояти Хатлон иттилоъ доданд, дар самти назорати иҷрои қонунгузории замин соли гузашта 116 санҷиш оид ба бартарафсозии қонунвайронкуниҳо гузаронида шуда, 3711 санадҳои прокурорӣ бароварда шуд. Бо баррасии санадҳои эътиноии прокурорӣ 2092 нафар ба ҷавобгариҳои моддӣ, интизомӣ ва маъмурӣ кашида шуданд. Ҳамчунин, ба 445 санади ғайриқонунии шахсони мансабдор эътироз оварда шуда, онҳо қонеъ карда шуданд. Инчунин, барои ғайриқонунӣ додани замин, худсарона ишғол кардани қитъаи замин ва дигар ҷиноятҳо 391 парвандаи ҷиноятӣ, аз ҷумла нисбат ба 112 нафар шахсони мансабдор ва хизматчиёни давлатӣ оғоз гардидааст. 

   Қобили қайд аст, ки шумораи умумии санадҳои эътиноӣ нисбат ба соли 2019-ум 1155 адад ё 45 фоиз ва парвандаҳои ҷиноятӣ 81 адад ё 26 фисад зиёд мебошад.

   Бино ба иттилои ёрдамчии прокурори вилояти Хатлон Варқа Зайниддин дар натиҷаи як санҷиши гурӯҳи кории Прокуратураи вилоят дар ноҳияи Ёвон зиёда аз 300 лаҳзаи ғайриқонунӣ ҷудо намудани замин, сохтакории хизматӣ, аз як гурӯҳ ба гурӯҳи дигар гузаронидани заминҳо ва суйистифода аз ваколатҳои мансабӣ аз ҷониби шахсони мансабдори мақомоти иҷроияи маҳаллии ҳокимияти давлатии ноҳияи Ёвон ва идораи Кумитаи замини ноҳия ошкор карда шудааст. Дар натиҷа нисбат ба 12 нафар шахсони мансабдор парвандаҳои ҷоноятӣ оғоз карда шудааст, ки қисме аз онҳо аллакай ба суд ирсол гардидааст. Қисмати дигар дар арафаи анҷомёбии тафтиши пешакӣ қарор доранд. 

Соли 2020 бо санадҳои эътиноии прокурорӣ масоҳати 4120 гектар қитъаҳои замини худсарона забтшуда  ва ғайриқонунӣ тақсимгашта ба ҳолати аввала бар гардонида шуданд, ки нисбат ба соли 2019-ум 925 гектар зиёд мебошад.