Деҳа “30-солагии Истиқлол” ном гирифт

Деҳае, ки дар он 67 оилаи зарардида аз сел дар ноҳияи Хуросон бо манзили истиқоматии нав таъмин шуданд, “ 30-солагии Истиқлол” ном гирифт. Дар ин бора раиси ноҳияи болозикр Илҳом Аҳмадзода зимни нишасти матбуотӣ иттилоъ дод. 
Ӯ ҳамчунин гуфт, ки дар ҷойи деҳаи пештараи “Неъматуллои Асадулло”, ки соли 2020 аз офати табиӣ зарар дида буд, бунёди корхонаи саноатӣ ба нақша гирифта шудааст. 
Раиси ноҳия ҳамчунин афзуд, ки мувофиқи хулосаи геологҳо бояд 59 оилаи дигар аз мавзеъҳои хатарнок ба ҷойи бехавф кӯчонида шаванд.  Айни замон масъалаи ҷудо кардани қитъаи замин ба ин оилаҳо баррасӣ шуда истодааст. 
Маврид ба ёдоварист, ки соли сипаригардида 67 хонавода, дар ноҳияи Хуросон бар асари омадани сел хонаҳояшон қисман ё пурра вайрон шуда, бо дастгирии Ҳукумати ҷумҳурӣ, вилоят ва соҳибкорони хайрхоҳ бо хонаҳои истиқоматии нав таъмин карда шуданд. 
Сулаймон СУЛТОНОВ