1000 тонна анор ҷамъоварӣ шудааст

Дар ноҳияи Дӯстии вилояти Хатлон дар майдони 1050 гектар боғҳои анор мавҷуд аст, ки 650 гектари он аллакай ҳосилдиҳанда аст. Ин нуқтаро зимни нишасти матбуотӣ, 16-уми феврали соли ҷорӣ раиси ноҳияи болозикр Саидзода Нурмуҳаммад зикр кард. 
Қайд гардид, ки соли 2020 аз ин боғҳо зиёда аз 1000 тонна анор ҷамъоварӣ шуда, 300 тоннаи он ба хориҷи кишвар, аз ҷумла ба Қазоқистон содирот гардидааст. Анорпарварони ин ноҳия ҳосили боқимондаро дар бозорҳои ҳудуди вилоят ва шаҳри Душанбе пешкаши харидорон гардонида, аз ин ҳисоб фоидаи хубе низ ба даст оварданд. Деҳқонон азм доранд соли ҷорӣ низ парвариши ин меваи хуштамъро хуб ба роҳ монда, дар таъмини амнияти озуқавории мамлакат ҳиссаи арзандаи хешро бештар гузоранд.
-Соли 2020 дар ҳамаи бахшҳои хоҷагидории ноҳияи Дӯстӣ дар майдони 19 ҳазору 197 гектар кишти зироатҳои кишоварзӣ гузаронида шудааст, ки нисбати соли 2019-ум 615 гектар зиёд мебошад, - гуфт раиси ноҳия. 
Сулаймон СУЛТОНОВ