Дастаи ҷавонони “Хатлон” қадрдонӣ шуданд

Дар толори хурди мақомоти иҷроияи маҳаллии ҳокимияти давлатии шаҳри Бохтар, рӯзи 14-уми январи соли ҷорӣ маросими ҷоизасупории ҳайати ҷавонони дастаи футболи “Хатлон” баргузор гардид.
Тавре хадамоти матбуотии раиси шаҳри Бохтар иттилоъ додааст, дар ин ҷамъомад раиси шаҳри Бохтар Сиҷоуддин Саломзода, ноиби президенти ФФТ Алишер Урунов, директори генералии Лигаи футболи Тоҷикистон Сайвалӣ Шоқурбонов ва муовини аввали раиси ФФВХ Исроил Шарипов иштирок карданд.
Раиси шаҳр ҳайати ҷавонони дастаи футболи “Хатлон”-ро барои ба даст овардани нишондоди хуб табрик намуд.
Ноиби президенти ФФТ Алишер Урунов зимни баромади хеш қайд кард, ки дастаи “Хатлон” беҳтарин мактаби футболи мамлакат ба ҳисоб рафта, тарбиятгирандагонаш дар ҳайати дастаҳои мунтахаби наврасону ҷавонон шарафи футболи Тоҷикистонро дар арсаи байналмилалӣ ҳимоя мекунанд.
Њайати дастаи ҷавонони “Хатлон”аз ҷониби директори генералии Лигаи футболи Тоҷикистон Сайвалӣ Шоқурбонов бо медалҳо сарфароз гардонида шуданд.
Ёдовар мешавем, ки ҳайати ҷавонони дастаи “Хатлон” дар мавсими гузашта медалҳои биринҷии Чемпионати Тоҷикистонро оид ба футбол байни ҳайатҳои ҷавонон ба даст оварда буданд.
       Сулаймон СУЛТОНОВ