Муассисаи “Обҳои нӯшокӣ ва коррезӣ”-и Норак азнавсозӣ карда шуд

Дар доираи лоиҳаи “Обтаъминкунии шаҳри Норак” бо маблағгузории Бонки аврупоии таҷдид ва рушд бинои Муассисаи давлатии “Обҳои нӯшокӣ ва коррезӣ”-и шаҳр пурра таъмиру азнавсозӣ карда шуд.
Тавре роҳбари корхонаи мазкур Идибой Назруллоев зимни суҳбат иброз кард, маблағи умумии лоиҳа 6 миллион доллари америкоиро дар бар гирифта, се миллиони он ҳамчун грант ва се миллиони дигараш қарз ба муҳлати 15 сол мебошад.
Номбурда ҳамчунин иттилоъ дод, ки дар доираи ин лоиҳа ворид намудани техникаҳои наву замонавию механизмҳои лозима, васл кардани обченкунакҳо, иваз кардани қубурҳои калон ва сохтмони пойгоҳи обкашию партовпартоӣ ба нақша гирифта шудааст.
-Аллакай ҳашт адад техникаҳои муосир ворид гардида, бинои корхона аз таъмири асосӣ бароварда шуд. Муҳлати амалишавии лоиҳа то моҳи декабри соли ҷорӣ буда, то инҷониб наздики 30 фоизи корҳо иҷро шудаанд,-гуфт И. Назруллоев.
            Сулаймон СУЛТОНОВ