МОДАРОНИ БОХТАРӢ БА АЁДАТИ САРБОЗОН РАФТАНД

Занони шаҳри Бохтар бо сарварии муовини раиси вилояти Хатлон Фируза Шарифӣ ва дар якҷоягии  гурӯҳи корӣ аз пойтахти кишвар бо иштироки Абдураҳмон Маҳмад, ноиби Академияи илмҳои Ҷумҳурии Тоҷикистон ба қисмҳои ҳарбии воқеъ дар қаламрави шаҳр рафта аз шароити хизмат ва будубоши сарбозон дидан намуданд.

Тавре аз   Раёсати кор бо занон ва оилаи назди мақомотҳои иҷроияи ҳокимияти давлатии вилояти Хатлон хабар доданд, ин дидор зери шиори «Мо-модарон, ба аёдати сарбозони ватан меравем!», ки дар асоси нақша - чорабиниҳои Раёсати кор бо занон ва оилаи назди мақомотҳои иҷроияи ҳокимияти давлатии вилояти Хатлон ва шаҳри Бохтар амалӣ карда мешавад, сурат гирифтааст.

- Ҳамчунин аз ҷониби модарон барои афсарону сарбозон дастурхони пурнозу неъмат ороста шуд, ки ба руҳияи сарбозон таъсири ҷиддии мусбӣ гузошт. Мо бовар дорем, ки чунин вохӯриҳо дар бедор сохтани эҳсоси ватанпарастӣ ва рушди ҳуввияти миллии ҳомиёни Ватан нақши муассир дошта метавонад. Гузашта аз ин волидони сарбозон аз вазъи хизмат дар сафи Қувваҳои мусаллаҳ ва шароити будубоши аскарон аз наздик шинос шуданд, ки ин кор барои иҷрои нақшаи сафарбаркунии ҷавонон барои хизмати аскарӣ хеле муҳим мебошад. Мо тасмим гирифтаем, ки то оғози мавсими даъвати баҳорӣ чунин вохўриҳоро бештар ташкил намоем, - илова кард манбаъ.  

Дар анҷоми дидор дар толори Раёсати Қушунҳои сарҳадии вилояти Хатлон бо иштироки меҳмонон, волидон ва ҳайати шахсӣ ҷаласаи мутантан баргузор гардид.

          Абўбакри ФАЙЗАЛӢ, (суратҳо аз Акмал Саидзода)