Дар Қубодиён панҷгоник ба дунё омад

Сокини 30–солаи ноҳияи Қубодиёни вилояти Хатлон Дилноза Бобоева рӯзи 30-уми декабри соли ҷорӣ дар зоишгоҳи ҷумҳуриявии шаҳри Душанбе панҷгоник таваллуд кардааст. Ин модари хушбахт аввалин нафарест, ки дар Тоҷикистон панҷгоник ба дунё овардааст.
Ба қавли мудири Муассисаи давлатии “Пажуҳишгоҳи илмию тадқиқотии акушерӣ, гинекологӣ ва перинатологии Тоҷикистон” Гулҷаҳон Давлатзода панҷгоникҳои ба дунёомада ду писар ва се духтар буда, ҳар кадом бо вазни аз якуним то ду килограммӣ ба дунё омадаанд. Номбурда ҳамчунин гуфтааст, ки ҳолати навзодон хуб буда, зери назорати табибон қарор доранд.
Муовини раиси ноҳияи Қубодиён Шарифзода Тоҷинисо зимни суҳбат иттилоъ дод, ки ин зан сокини деҳаи “Бобоҷон Ғафуров”-и Љамоати “20 –солагии Истиқлол”-и ноҳия мебошад. “Модари ин тифлони ба дунёомада ду моҳи охир зери назорати табибони ин зоишгоҳ қарор доштааст, ва муддати бист рӯз дар онҷо бистарӣ буд. Аллакай аз ҷониби мақомоти иҷроияи маҳаллии ҳокимияти давлатии ноҳияи Қубодиён ба ин хонавода кмак расонида шуд. Ҳамин, ки онҳо сиҳату саломат ба ноҳия баргарданд, боз ба онҳо духтури махсус барои зери назорат гирифтани тифлон ва модари онҳо ҷудо карда мешавад. Инчунин мақомоти маҳаллӣ нақша дорад, ки ба ин оилаи хушбахт баъди ба хона омадан боз кумаки молиявӣ тақдим намояд.
Дар гузашта чанд мавриди таваллуди сегонику чоргоник дар Тоҷикистон сабт шуда буд. Аммо ба дунё омадани панҷгоник бесобиқа мебошад.
               Сулаймон СУЛТОНОВ