Дастаи “Ҳосилот”-и Кӯшониён чемпиони Тоҷикистон шуд

Дастаи футболи “Ҳосилот”-и деҳаи Ҳосилоти Ҷамоати деҳоти Заргари ноҳияи Кӯшониён дар мусобиқаи футболи байни деҳаҳо барандаи ҷоми ин мусобиқа гардидааст.
Бино ба иттилои директори Мактаби варзишии ноҳияи болозикр Парвиз Азимов мусобиқаи мазкур бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мақсади ташвиқу тарғиби тарзи ҳаёти солим байни деҳаҳои саросари мамлакат роҳандозӣ гардид.
Номбурда ҳамчунин афзуд, ки мусобиқа моҳи марти соли 2020 оғоз гардида, марҳилаи аввал дар сатҳи шаҳру ноҳияҳо, марҳилаи дуюм дар сатҳи вилоятҳо ва марҳилаи сеюм дар сатҳи ҷумҳурӣ баргузор карда шуд.
Даври ниҳоии он аз 21-ум то 26-уми декабр дар шаҳри Душанбе доир гашта, дар финал дастаи “Ҳосилот” бо дастаи ноҳияи Нуробод андари майдон шуда, бо ҳисоби 1-0 ғалаба ба даст оварда, барандаи ҷоми мусобиқа гардид.
Аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон дастаи “Ҳосилот” бо ифтихорнома ва 10 ҳазор сомонӣ қадрдонӣ гардид.
                 Сулаймон Султонов