ДАР БОХТАР ДӮКОНҲОИ РӮЗНОМАФУРӮШӢ БА ФАЪОЛИЯТ ОҒОЗ КАРДАНД

Дар маркази маъмурии вилояти Хатлон – шаҳри Бохтар нахустин дӯкони фурӯши рӯзномаву маҷаллаҳо ба фаъолият оғоз кард.
Тавре директори корхонаи фаръии КВД “Почтаи тоҷик” дар вилояти Хатлон Сайдалӣ Мирзоев иттилоъ дод, дар маҷмӯъ дар шаҳри Бохтар 10 адад ин гуна дӯконҳои замонавӣ насб хоҳанд шуд.
Номбурда ҳамчунин зикр кард, ки рӯзҳои наздик дар шаҳру ноҳияҳои Кӯлоб, Данғара ва Шамсиддин Шоҳин чунин дӯконҳои хуштарҳу замонавӣ ба фаъолият оғоз хоҳанд кард.
Дар маҷмӯъ то соли 2025 дар қаламрави вилояти Хатлон бояд 50 адад ҳамин гуна дуконҳои замонавии фурӯши рӯзномаву маҷаллаҳо сохта шаванд, ки баъди ба фаъолият оғоз кардани онҳо 50 нафар сокинон бо ҷойи кори доимӣ ва маоши хуб таъмин хоҳанд шуд.
                                  Сулаймон СУЛТОНОВ