ОЗМУНҲО ҶАМЪБАСТ ГАРДИДАНД

Дар маркази маъмурии вилояти Хатлон – шаҳри Бохтар даври вилоятии озмуни ҷумҳуриявии “Фурӯғи субҳи доноӣ китоб аст” ва “Тоҷикистон - Ватани азизи ман” ҷамъбаст гардид. Дар натиҷа 110 нафар аз вилоят ба даври ҷумҳуриявӣ роҳхат гирифтанд.
Озмунҳои мазкур ба ифтихори ҷашни 30-солагии Истиқлолияти давлатии Ҷумҳурии Тоҷикистон таҳти сарпарастии бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон миёни қишрҳои мухталифи ҷомеа, аз ҷумла хонандагону донишҷӯёни ҳамаи зинаҳои таҳсилот ва сокинони касбу кори гуногуни кишвар баргузор гардида истодааст.
Тавре аз мақомоти иҷроияи маҳаллии ҳокимияти давлатии вилояти Хатлон иттилоъ доданд, дар озмуни “Фурӯғи субҳи доноӣ китоб аст”, ки аз рӯи панҷ номинатсия дар шаҳру ноҳияҳои вилоят баргузор гардид, 5 ҳазору 100 нафар иштирок карда, 753 нафарашон ба даври вилоятӣ роҳхат гирифтанд. Баъди натиҷагирии даври вилоятӣ бошад 83 нафар ба марҳилаи ниҳоӣ роҳ ёфтанд, ки 43 нафар нисбати соли гузашта зиёд мебошад.
Дар озмуни “Тоҷикистон - Ватани азизи ман” низ 252 довталаб аз шаҳру ноҳияҳои вилоят ширкат карда, 27 нафар ба даври ҷумҳуриявӣ роҳхат гирифтанд.
Бо мақсади татбиқи Амрҳои Президенти Ҷумҳурии Тоҷикистон аз 5 феврали соли 2020, №1339 ва 1335 “Дар бораи баргузории озмуни ҷумҳуриявии “Фурӯғи субҳи доноӣ китоб аст” ва “Тоҷикистон – Ватани азизи ман” қарорҳои раиси вилояти Хатлон аз 5 марти соли 2020, №81 ва №82 қабул карда шуда, барои ҳавасмандгардонии ғолибони озмунҳои “Фурӯғи субҳи доноӣ китоб аст” 166 ҳазор сомонӣ ва барои “Тоҷикистон – Ватани азизи ман” 131 ҳазор сомонӣ ҷудо гардид.
Муовини раиси вилояти Хатлон, ҳамзамон раиси комиссияи ҳар ду озмун Фирӯза Шарифӣ дар вазъияти тантанавӣ ба ғолибон ва иштирокчиёни фаъол сипоснома ва мукофотҳои пулиро тақдим намуд.
                          Сулаймон СУЛТОНОВ