НОСИРИ ХУСРАВ: 18 чоҳи амудӣ сохта шуд.

Дар ноҳияи Носири Хусрав зиёда аз як километр роҳро сангфарш карда, тавассути 18 чоҳи амудӣ сокинони ду ҷамоати деҳотро бо оби тозаи ошомиданӣ таъмин намуданд. Дар ин бора Азимзода Машҳура, муовини раиси ноҳияи Носири Хусрав хабар дод. 

Дар доираи истиқболи арзанда аз ҷашни 30 – солагии Истиқлолияти давлатии Ҷумҳурии Тоҷикистон дар ноҳияи Носири Хусрав бунёдкориҳо бомаром идома дорад. Сокинони Ҷамоати деҳоти Фирўза дар маҳаллаи «Рўзиобод» бо дастгирии мақомот ва ҳамкорӣ бо идораи нигоҳдории роҳҳои автомобилгард зиёда аз 1 километр роҳро сангфарш намуданд. Роҳи ин деҳа бо иқдоми сокинони ватандўсташ обод гардида, дар моҳҳои наздик ин роҳ бо дастгирии мақомоти иҷроияи ҳокимияти давлатии ноҳияи Носири Хусрав, соҳибкорони бонангу номуси диёр мумфарш хоҳад шуд.

Дар баробари вусъати корҳои созандагию бунёдкорӣ, таъмиру азнавсозӣ ва сангфаршу мумфарш кардани роҳхои маҳал бо иқдоми мақомот дар деҳаи «Рўзиобод» хатҳои обгузар гузаронида, 22 оилаи ин деҳаро бо оби тозаи ошомидании «Чилучорчашма» таъмин карданд.

Тавре Азимзода Машҳура, муовини раиси ноҳияи Носири Хусрав иброз дошт дар ҷамоатҳои деҳоти «Фирўза» ва «Наврўз» бо иқдоми мақомоти маҳал ва ҷалби лоиҳаи маблағгузор, дастгирии Ҳукумати Ҷумҳурии Тоҷикистон дар чуқурии 50 – 80 метр тавассути кандани 18 чоҳи амудӣ об бароварда шуд ва беш аз 20 ҳазор сокинони деҳоти номбурдаро бо оби тозаи ошомиданӣ таъмин карданд.

-Амалигардонии иқдомҳои созанда, бунёдкориҳо дар доираи истиқболи арзанда аз 30 – солагии Истиқлолияти давлатии Ҷумҳурии Тоҷикистон дар ноҳияи Носири Хусрав вусъати тоза ёфта, сокинони маҳал, соҳибкорони ватанӣ аз сиёсати бунёдкоронаи Ҳукумати Ҷумҳурии Тоҷикистон дастгирии комил менамоянд,- зикр намуд М. Азимзода.