НАХУСТИН КОРХОНА ДАР МОИ “КӮЛОБ”

Бо ибтикори соҳибкори ватанӣ, роҳбари ҶДММ “Тоҷик Алмос” Хайриддин Бобоев дар Минтақаи озоди иқтисодии “Кӯлоб” нахустин субъекти соҳибкорӣ ба қайд гирифта шуд.
Тавре сомонаи Вазорати рушди иқтисод ва савдои Ҷумҳурии Тоҷикистон хабар додааст, оид ба пешбурди фаъолият дар МОИ “Кӯлоб” бо ҶДММ “Тоҷик Алмос” созишномаи ҳамкорӣ ба имзо расидааст.
Масъулини ҶДММ “Тоҷик Алмос” нақша доранд дар давоми 1,5 соли оянда дар онҷо корхонаи истеҳсоли қисмҳои мошинро бунёд намоянд. Сохтмони корхона дар майдони 1 гектар замин ба нақша гирифта шуда, он бо харҷи беш аз 1,5 миллион сомонӣ сохта мешавад. Дар марҳилаи аввал масъулини корхона ният доранд истеҳсоли ҳавотозакунакҳои (филтерҳои) намудҳои гуногун (ҳавоӣ ва равғанӣ) – ро барои воситаҳои нақлиёти автомобилӣ ба роҳ монанд.
Баъди бунёд шудани корхона 20 нафар мутахассисони маҳаллӣ бо ҷойи кори доимӣ ва маоши хуб таъмин хоҳанд шуд.
Ёдовар мешавем, ки Минтақаи озоди иқтисодии “Кӯлоб” соли 2019 дар майдони 309 гектар ба қайд гирифта шуда, соли 2020 ба фаъолият оғоз намуд.
                                                                         Сулаймон СУЛТОНОВ