СОДИРОТИ МАҲСУЛОТИ КИШОВАРЗӢ

Давоми шаш моҳи соли ҷорӣ аз вилояти Хатлон ба хориҷи мамлакат 82 ҳазору 876,6 тонна маҳсулоти кишоварзӣ содирот шудааст, ки ин рақам нисбат ба ҳамин давраи соли гузашта 7 ҳазору 193, 8 тонна зиёд мебошад.

Тавре сардори Сарраёсати кишоварзии вилояти Хатлон Амирбеки Темур зимни нишасти матбуотӣ бо хабарнигорон иттилоъ дод, аз ҷамъи умумии маҳсулоти содиротшуда 14 ҳазору 414,6 тонна бор тавассути нақлиёту тайёра ва 68 ҳазору 462 тоннаи дигараш тариқи роҳи оҳан ба кишварҳои хориҷа содирот гардидааст. Дар маҷмӯъ маҳсулоти содиротгашта 92,1 фоизи нақшаи солонаро дар бар мегирад.

Номбурда ҳамчунин гуфт, ки аз вилоят ба хориҷи кишвар 80 ҳазору 472,8 тонна сабзавот, аз он ҷумла 80 ҳазору 421,8 тонна пиёз, 59,8 тонна полезӣ, 2 ҳазору 308 тонна мевагиҳо ва 36 тонна дигар намуди маҳсулот содирот шудааст, ки бештари онҳо аз шаҳру ноҳияҳои Ҷайҳун, Панҷ ва Шаҳритуз мебошанд.

Манбаъ афзуд, ки маҳсулоти кишоварзии вилояти Хатлон асосан ба давлатҳои Россия, Литва, Афғонистон, Қазоқистон, Қирғизистон ва Покистон содирот карда шудааст ва айни замон содирот идома дорад.

                                                                   СУЛАЙМОН СУЛТОНОВ