«ДУХТАРОНИ ПРЕЗИДЕНТ»
Дар Тоҷикистон ҷавонон, ки аксарияти аҳолии онро ташкил медиҳанд, пайваста мавриди таваҷҷуҳи давлату ҳукумат қарор доранд. Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба ҷавонони кишвар ҳамчун неруи ояндасоз аҳамияти хоса дода, баҳри муҳайё сохтани шароити таҳсил ва вазъи зиндагиву таъмини онҳо бо ҷойҳои корӣ мунтазам тадбирҳои судманд меандешанд.Барои дастгирӣ ва ҳавасмандгардонии ҷавонон тӯли солҳои истиқлолият як қатор имтиёзҳо аз қабили: таъсиси Квота ва Стипендияи президентӣ, тариқи Маркази миллии тестӣ дохил шудан ба муассисаҳои таҳсилоти олӣ ва касбии ҷумҳурӣ, таъсиси Шӯрои миллии кор бо ҷавонон дар назди Президенти Ҷумҳурии Тоҷикистон ва монанди инҳо шаҳодати таваҷҷуҳ ва ғамхории Сарвари давлатамон нисбат ба мо-ҷавонон аст.
Махсусан, соли 2017-ро «Соли ҷавонон» эълон намудани Пешвои миллат такони ҷиддие дар рӯҳу равони ҷавонони кишвар бахшид. Ҷашну тантанаҳо, чорабиниҳои сиёсиву фарҳангӣ, маърифативу тарбиявие, ки дар ин сол амалӣ гардиданд, дар зеҳни мо - ҷавонон таъсири амиқе гузошта, боварии моро ба неруи хеш ва ояндаи дурахшони Ватани маҳбубамон ба маротиб афзуд. Фикр мекунам, ки маҳз эълони «Соли ҷавонон» ва зоҳир гардидани бовариву таваҷҷуҳи самимонаи Сарвари давлатамон нисбат ба ҷавонон боис гардид, ки камина дар чорабиниҳои зиёди сатҳи ноҳиявӣ ва вилоятӣ фаъолона ширкат варзида, маҳорату истеъдоди худро сайқал додам ва ҷаҳони маънавии худро ғанитар гардондам. Чун аз хурдӣ дар дил орзуи муаллима шуданро мепарваридам, аз дастгириҳои Сарвари давлатамон рӯҳбаланд гардида, пайи амалӣ намудани он камари ҳиммат бастам. Дар натиҷаи саъю кӯшиш ва такмили илму дониш ба ман муяссар гирдид, ки дар се даври (мактабӣ, ноҳиявӣ ва вилоятӣ) озмун барои сарфароз гардидан ба Квотаи президентӣ омодагии хуб гирифта, тариқи суҳбат, бе имтиҳони Маркази миллии тестӣ, сазовори номи донишҷӯӣ гардам. Хушҳол ва сипосгузор аз Пешвои миллат ҳастем, ки ба мо ҷавонон махсусан духтарон аз ноҳияҳои дурдаст ғамхорӣ зоҳир намуда, барои амалӣ гаштани орзуҳоямон имконият медиҳанд. Ман ҳамроҳи чандин нафари дигар аз ноҳияи ба номи Носири Хусрав, ки яке аз навоҳии дурдасти вилояти Хатлон маҳсуб меёбад, бо шарофати Сарвари давлатамон имрӯз соҳиби номи донишҷӯй гардида, дар яке аз муассисаҳои таҳсилоти олии касбии кишварамон дар шаҳри Бохтар таҳсил намуда истодаем.
Айни ҳол, ман дар курси сеюми ихтисоси забон ва адабиёти тоҷик, факултети филологияи тоҷики ДДБ ба номи Носири Хусрав таҳсили худро идома дода истодам. Ҳар гоҳе, ки пешрафту дастовардҳои ҳамсолони худро дар ҷодаи илму ҳунар мебинам, дарк менамоям, ки дар пасманзари ин муваффақиятҳо, пеш аз ҳама, симои сарвари оқилу ғамхор, сиёсатмадори сатҳи ҷаҳонӣ ва дасти мадади Пешвои муаззами кишварамон, муҳтарам Эмомалӣ Раҳмон меистад, ки бо заҳмати бедареғ ва неруи хастанопазир баҳри худшиносии мо-ҷавонон ва таҳкими амнияти давлату миллат пайваста саъю талош менамоянд. Бо дарки ин нукта, ифтихор менамоям, ки Сарвари давлати мо чунин шахси худогоҳ, ватанпараст, башардӯсту худодод мебошад. Аз ғамхориҳои падаронаи ӯ нисбат ба ҷавонон неру гирифта, меболам, аз он ки дар донишгоҳ моро ба ҳайси «Духтарони Президент» ном мебаранд. Устодон мунтазам ба вазъи таҳсилу сатҳи илму дониши мо диққати махсус зоҳир намуда, таъкид месозанд, ки шахси фаъоли ҷомеа, сазовори боварӣ ва ғамхориҳои падаронаи Сарвари давлат бошем.
Айни замон банда барои бароварда сохтани орзуву омол ва расидан ба ҳадафҳои худ саъй мекунам, ки бо баҳои хубу аъло таҳсил намоям. Бо истифода аз фазои мусоиди илму таълим тамоми неруи зеҳнии худро барои аз бар кардани илми муосир, омӯзиши техника ва технологияи замонавии таълим равона намуда, кӯшиш менамоем, ки баҳри фаъолияти ояндаи худ бо донишҳои зарурӣ мусаллаҳ гардам ва дар рушди ҷомеаи демократии кишвари азизам саҳми худро гузорам.
Светлана ХУҶАМҚУЛОВА,
