Саҳми шоистаи соҳибкорон дар Кӯшониён

Дар доираи омодагиҳо ба ҷашни умумимиллии 30- солагии Истиқлолияти давлатии Ҷумҳурии Тоҷикистон, аз ҷониби соҳибкори маҳаллӣ Фақерзода Анвар дар ҷамоати шаҳраки Исмоили Сомонии ноҳияи Кӯшониён сохтмони бинои меҳмонхона, тарабхона ва беморхонаи хусусӣ бо маром идома доранд. Тавре аз мақомоти иҷроияи маҳаллии ҳокимияти давлатии ноҳияи Кӯшониён иттилоъ доданд, бинои меҳмонхона ва тарабхона бо харҷи 2 миллиону 773 ҳазор сомонӣ бунёд гардида, он аз 14 ҳуҷра, 20 ҷойи хоб, ду толори маҷлисгоҳ, тарабхона барои 300 нафар ва як маркази савдо иборат мебошад. 
Беморхонаи хусусӣ бошад аз 18 ҳуҷраи духтурон ва 25 ҳуҷраи хоби беморон иборат буда, бо масрафи 2 миллиону 330 ҳазор сомонӣ бунёд хоҳад шуд. 
Тибқи нақша бояд онҳо дар арафи ҷашни байналмилалии Наврӯз мавриди баҳрабардорӣ қарор гиранд. Баъди ба истифода додани иншооти мавриди назар чанде аз сокинони маҳаллӣ бо ҷойи кори доимӣ ва маоши хуб таъмин хоҳанд шуд.  
Сулаймон СУЛТОНОВ