РУШДИ ҶАНГАЛПАРВАРӢ
Муассисаи давлатии хоҷагии ҷангали вилояти Хатлон ва идораҳои зертобеи он баҳри амалигардонии талаботи Кодекси ҷангали Ҷумҳурии Тоҷикистон, Барномаҳои давлатӣ ва иҷрои супоришҳои Президенти мамлакат, ки аз Паёми роҳнамо бар меояд чораю тадбирҳои муҳимро роҳандозӣ менамоянд.- Дар ин ҷода Паёми роҳнамои Пешвои муаззами миллат ҳамдаму ҳамнафаси кормандони хоҷагии ҷангали вилоят ва муассисаҳои зертобеи он мебошад,- таъкид дошт дар суҳбат муовини директори Муассисаи давлатии хоҷагии ҷангали вилояти Хатлон Қувваталӣ Назиров.
Воқеан, кори сармуассиса ва панҷ муассисаи давлатии хоҷагии ҷангали минтақаи Бохтар тибқи талаботи замон ба роҳ монда шудааст. Дар ин миён метавон кори муассисаи давлатии хоҷагии ҷангали ба номи Абдусалом Холови ноҳияи Хуросонро намунаи ибрат арзёбӣ дошт. Ҷангалпарварони ин муассиса соли равон дар майдони 6,5 гектар замини санглохи бекорхобида боғи нави чормағз бунёд карда, 1 ҳазору 100 ниҳоли чормағз шинониданд. Дар байни қатори боғ бошад, гандум кишт карда, ҳар қитъа заминро самаранок истифода мебаранд.
- Мо ҳидоятҳои созандаи Паёми роҳнаморо сармашқи кори худ намуда, тавассути техникаҳои пуриқтисод замини санглохро тахту ҳамвор карда, сангҳои калонро аз замин ҷамъоварӣ кардем, аз масофаи беш аз як километр аз дарёи Вахш тавассути қубурҳои обгузар об баровардем ва зиёда аз 12 гектар замини санглохро ба гардиши кишоварзӣ ворид намудем, бо нигоҳи ватандорӣ таъкид дошт сарҷангалбони Муассисаи давлатии хоҷагии ҷангали ноҳияи Хуросон Рустам Тағоев.
Дар ҳақиқат, дар оғози соли 2020 дар баробари бунёди 6,5 гектар боғи чормағз дар майдони 3,5 гектар боғи бодом,2 гектар боғи писта бунёд карданд. 2,5 бех бодом ва 840 бех ниҳоли писта шинонида шуд. Мақсад доранд, ки боз дар ду тарафи дараҳои ин мавзеъ 2 ҳазору 400 бех ниҳоли писта шинонанд. Ҳангоми ниҳолшинонӣ аз поруҳои маҳаллӣ ва нуриҳои минералӣ низ самаранок истифода мебаранд. Дар байни навниҳолони бодом бошад, имрӯз пиёз нашъунамои муътадил дорад. Ҳамчунин зарурат ва аҳамияти яхобмониро ба хубӣ дарк карда, ҷангалзорҳои куҳнаро яхоб монданд, то гулкунии дарахтон дертар ба вуқӯъ пайвандад ва ҳосил бо сард омадани ҳаво дар аввали баҳор талаф наёбад.
