Содиршавии ҷиноят паст гардидааст

Прокуратураи вилояти Хатлон соли 2022 дар самти назорати умумӣ аз натиҷаи 1684 санҷиш 5527 амр, 3914 эътироз ва 2739 пешниҳод оварда, бо баррасаи санадҳои эътиноии прокурорӣ 17 ҳазору 302 нафар ба ҷавобгарии интизомӣ, моддӣ ва маъмурӣ кашида шудаанд. Ин нишондод дар қиёс ба ҳамин давраи соли 2021 ба андозаи 1173 адад зиёд мебошад.
Дар ин бора Прокурори вилояти Хатлон Абрураҳим Раҳимзода зимни нишасти матбуотӣ хабар дод. 
Ӯ афзуд, ки тариқи назорати умумӣ зарари расонидашуда ба маблағи 293 миллион сомонӣ барқарор карда шудааст.
Гуфта шуд, ки таҳлили вазъи ҷиноят дар вилоят нишон дод, ки соли 2022 сатҳи содиршавии ҷиноят 10,4 фоиз паст гардида, кушодашавии ҷиноятҳо 78,7 дарсадро ташкил медиҳад. 
-Тафтишоти пешакӣ дар мақомоти прокуратура рӯ ба беҳбудӣ ниҳода, дар давраи ҷамъбастӣ аз ҷониби муфаттишон 1966 парванда ба пешбурд қабул гардида, аз ин тафтиши пешакии 1262 парванда ба итмом расонида шудааст. Бо тасдиқи фикри айбдоркунӣ 1204 парванда ба суд ирсол карда шудааст, ки нисбат ба ҳамин давраи соли 2021-ум 19 парванда зиёд мебошад, гуфт, А. Раҳимзода. 
Дар давоми соли 2022 аз ҷониби прокуратураи вилояти Хатлон 134 ҳолати ҳодисаҳои худкушӣ ва сӯиқасд ба он ба қайд гирифта шудааст, ки нисбат ба ҳамин давраи соли 2021 тамоюли пастравӣ дорад. Перомуни ҳодисаҳои ба худкушӣ расонидан 16 парвандаи ҷиноятӣ оғоз гардида, то ин ҷониб 13 парванда ба суд ирсол карда шудааст.
Сулаймон СУЛТОНОВ