Заҳролудшавии 48 нафар аз қурутоб

 24 январи соли равон 48 нафар сокинони деҳаи Чагами Ҷамоати деҳоти Чагами ноҳияи Шамсиддини Шоҳин ҳангоми истеъмоли хӯроки қурутоб заҳролуд шудаанд.
Тавре Сайраҳмон Назриев, сухангӯи Раёсати тандурустӣ дар вилояти Хатлон ба “Сафо” иттилоъ, дод баъди расидани ин хабар роҳбарияти Раёсати тандурустӣ ва Маркази назорати санитарию эпидемиологияи вилоят ба ҷойи ҳодиса рафтанд. Ҳамчунин гурўҳи мутахассисони ботаҷриба аз Вазорати тандурустӣ ва ҳифзи иҷтимоии аҳолии мамлакат ба ин ноҳия сафарбар шуданд.
Гуфта шуд, ки аз 48 нафари заҳролудшуда 24 нафараш ба беморхонаи вилоятии шаҳри Кӯлоб интиқол дода шуданд, боқимонда дар беморхонаи деҳотии Чагам бистарӣ карда шудаанд. 
Баъди муоинаи табибон як қисми беморон ба хонаҳояшон рухсат шуданд ва боқимондаҳо зери назорати табибон қарор доранд. 
Хушбахтона талафоти ҷонӣ ба қайд гирифта нашудааст. 
Айни замон мутахассисон ташхисҳои лозимиро анҷом дода, сабаби заҳролудшавиро муайян карда истодаанд.
Сулаймон СУЛТОНОВ