ЧАКОМАИ ГЕСУ

Дар марҳилаи аввали чорабинӣ занону духтарони ҳунарманду машшотаҳои моҳир дар баробари маҳсули дасти худ анвои гуногуни ороишоти занонаро ба намоиш гузоштанд. Дар он намунаҳои мухталифи ҳунарҳои мардумии қавму миллатҳои муқими вилоят ва шаклҳои анъанавию муосири ороиши мӯй, расму оини миллии ҳуснороӣ бори дигар ба ҷамъомадагон нишон дода шуд. 

Зимни боздид аз фестивал-озмуни номбурда муовини раиси вилоят Фирӯза Шарифӣ иброз намуд, ки бо таваҷҷуҳ ва дастгирии Ҳукумати Ҷумҳурии Тоҷикистон, бахусус Сарвари давлат муҳтарам Эмомалӣ Раҳмон ҳунарҳои қадимаи мардумӣ аз нав эҳё гардида, дар дохил ва хориҷи кишвар боз ҳам ҳаводорони худро пайдо намуда истодааст. Аз ин лиҳоз зарур аст, ки занону духтарон ба сифати маҳсулоти истеҳсолнамудаашон диққати аввалиндараҷа дода, онро вобаста ба талаботи замон барои фурӯш омода кунанд.

Сипас, дар толори "Кохи Ватан"-и шаҳри Бохтар бо иштироки масъулони Раёсату бахшҳои кор бо занон ва оила ва  гулдухтарони мӯйдароз фестивал-озмуни "Чакомаи гесу" баргузор гардид. 

Дар баромади худ муовини раиси вилоят Фирӯза Шарифӣ ҳадаф аз ин тадбири фарҳангиро намоиши ҳунар, ороишу парвариши мӯй, рӯй, ҳаракати мавзун, тарғибу ташвиқи сарулибоси миллӣ, аз қабили адрасу атлас, шоҳӣ, чакану алоча, гулбасту чит, тоқӣ ва маросимҳои анъанавии "саршӯён", "арӯсбаророн", "кокулбофӣ" ва баланд бардоштани ҳисси зебоипарастии ҷавондухтарон унвон намуд.

Дар идомаи даври вилоятии фестивал-озмун занону гулдухтарони хушхирому зебо аз ҳамаи шаҳру ноҳияҳо дар тан либоси миллӣ ба саҳна баромада, мӯйи дарозу ороишоти гуногуни ҳунари машшотагии якдигарро ба намоиш гузоштанд. 

Дар охир ба ғолибон ва иштирокчиёни фаъоли даври вилоятии фестивал-озмуни ҷумҳуриявии “Чакомаи гесу” сипоснома ва туҳфаҳои хотиравӣ тақдим карда шуд.