“Равшан”-и Кӯлоб қадрдонӣ шуд

- ВАРЗИШ -

Бо ташаббуси раиси вилояти Хатлон, ҳамзамон раиси Федератсияи футболи вилояти Хатлон ба дастаи “Равшан”-и шаҳри Кӯлоб барои дастовардҳои арзандаи варзишӣ дар ҳаҷми 37 ҳазору 500 сомонӣ кӯмаки молиявӣ расонида шуд.
Тавре аз мақомоти иҷроияи маҳаллии ҳокимияти давлатии шаҳри Кӯлоб хабар доданд, туҳфаҳои молиявӣ ва сипосномаҳои раиси вилоятро муовини раиси вилояти Хатлон Фирӯза Шарифӣ дар вазъияти тантанавӣ ба ҳайати дастаи “Равшан” дар маҷмӯъ ба 25 нафар яъне ба ҳар як бозингар 1500 сомонигӣ тақдим намуд.
Ҳамчунин иттилоъ дода шуд, ки ба ин дастаи овозадор аз ҷониби раиси шаҳри Кӯлоб Вализода Абдуқодир Исуф 30 ҳазор сомонӣ ва Ифтихорномаи мақомоти иҷроияи маҳаллии ҳокимияти давлатии шаҳри Кӯлоб тақдим карда шуд.
Ёдовар мешавем, ки дастаи “Равшан”-и шаҳри Кӯлоб соли ҷорӣ Ҷоми чемпионати футболи Тоҷикистонро соҳиб гардида буд.
           Сулаймон СУЛТОНОВ