22 окт 11:26АСОСӢ / Ахбор / Саноат ва кишоварзӣ / Фарҳанг / Иҷтимоъ / Мақомот / Иқтисод

«Хатлон Инвест – 2026»: имкониятҳои нав барои сармоягузорӣ

БОХТАР, 22 октябр. Имрӯз дар шаҳри Бохтар Форуми байналмилалии сармоягузории «Хатлон Инвест – 2026» оғоз гардид. Ҳадафи асосии ҳамоиш муаррифии имкониятҳои сармоягузории вилояти Хатлон, ҷалби сармояи дохилию хориҷӣ ва густариши ҳамкориҳои иқтисодию тиҷоратӣ мебошад.

Дар форум намояндагони Ҳукумати Ҷумҳурии Тоҷикистон, вазорату идораҳои давлатӣ, созмонҳои байналмилалии молиявӣ, шарикони рушд, ширкатҳои сармоягузории ватаниву хориҷӣ ва доираҳои соҳибкорӣ иштирок доранд.

Ҳамоиш бо намоиши маҳсулоти кишоварзӣ, саноатӣ ва ҳунарҳои мардумии вилояти Хатлон оғоз ёфта, дар давоми ду рӯз иштирокчиён бо имкониятҳои иқтисодию сармоягузории минтақа шинос мешаванд.

Дар доираи форум баргузории се панели соҳавӣ дар назар аст. Онҳо ба имкониятҳои сармоягузорӣ дар соҳаи кишоварзӣ, коркард ва содироти маҳсулоти аз лиҳози экологӣ тоза, рушди саноат ҳамчун омили пешбарандаи иқтисодиёт, инчунин истеҳсоли маҳсулоти рақобатпазир ва рушди логистика бахшида мешаванд.

Ҳамзамон, масъалаҳои рушди соҳибкорӣ, рақамикунонии соҳаҳои иқтисодиёт, таъсиси корхонаҳои истеҳсолӣ, тавсеаи инфрасохтори логистикӣ ва афзоиши содироти маҳсулоти ватанӣ баррасӣ мегарданд.

Яке аз бахшҳои муҳими форум баргузории мулоқотҳои мустақими соҳибкорону сармоягузорон дар шакли B2B ва баимзорасонии санадҳои ҳамкорӣ, созишномаҳо ва шартномаҳои сармоягузорӣ мебошад. Ин имконият фароҳам меорад, ки робитаҳои тиҷоратӣ густариш ёфта, барои татбиқи лоиҳаҳои нави иқтисодӣ замина гузошта шавад.

Дар рӯзи дуюми форум меҳмонону иштирокчиён ба шаҳри Норак сафар намуда, дар Фестивали «Анор» иштирок мекунанд. Ҳамчунин, боздид аз Минтақаи озоди иқтисодии «Данғара» дар барномаи сафар пешбинӣ шудааст.

Форуми байналмилалии сармоягузории «Хатлон Инвест – 2026» ба муаррифии иқтидори иқтисодии вилояти Хатлон, ҷалби сармояи нав, таҳкими ҳамкориҳои байналмилалӣ ва фароҳам овардани замина барои рушди устувори иқтисодии минтақа равона гардидааст.

С. СУЛТОНОВ

Похожие новости:

Добавить комментарий