Маҷаллаи Сафо
Чеҳра
Маслиҳати муфид
Номаҳо
03 май 09:23Саноат ва кишоварзӣ
ҚУЛФИНАЙПАРВАР
-Ҳар нафар метавонад деҳқонӣ кунад. Заҳмат кашида, дар замин кор кунад. Аммо рӯёнидани ҳосили фаровон аз киштзори худ, на ба ҳама даст медиҳад, - мегӯяд дар оғози суҳбат Ҳамроқул Сатторов, кишоварзи пуртаҷрибаи ноҳияи Вахш. -Танҳо деҳқони асил метавонад бо заҳмати шабонарӯзии худ дар гирифтани чанд ҳосил аз як замин ва парвариши маҳсулоти гуногуни кишоварзӣ муваффақ гардад, - идома дод ӯ.
Ҳамроқул Сатторов аз зумраи қулфинайпарварони номдорест, ки ҳамасола яке аз аввалинҳо шуда маҳсули дастранҷи худро ҷамъоварӣ менамояд. Ӯ сокини Ҷамоати шаҳраки “Киров”-и ноҳияи Вахш буда, 40 сол боз ба кишту парвариши тути заминӣ машғул аст.
Бобои Ҳамроқул 75 сол дошта, то ба ҳол дар саҳро кор мекунад. Вай кишоварзиро аз замини наздиҳавлигии худ оғоз намуда, парвариши ин намуди меваи баҳориро борҳо таҷриба кардааст. Вақте ки ҳамсояҳо ба парвариши қулфинай пардохтанд, завқи бобои Ҳамроқул низ ҷӯш зад. Дар оѓози кор ба мушкилот рӯ ба рӯ гашта, аз кор кардан дар замину парваридани ин меваи баҳорӣ дилсард мешуд, аммо бо гузашти вақт ӯ таҷриба пайдо намуд ва сирри корро омӯхт.
- Қулфинайпарварӣ кори пурзаҳмат аст, - мегӯяд Ҳамроқул Сатторов. – Вақте ки кореро наметавонӣ, иштибоҳ мекунӣ, зарар мебинӣ, маҷбур мешавӣ, то биомӯзӣ. Мо низ ин зинаҳоро гузаштем. Шукр, ки имрӯз тарзу усули парвариши қулфинай ва ҳосили фаровон рӯёниданро медонем.
Ба гуфтаи ин кишоварз нуҳ моҳ зарур аст, ки то кишту корашон натиљаи дилхоњ диҳад. Охирҳои фасли тобистон ба кишту кори тути заминӣ тараддуд мебинанд.
-Моҳи август мо майдони қулфинайи хоҷагии худро ба омода кардан шуруъ мекунем,- изҳор медорад ӯ. - Агар ниҳоли қулфинайи киштшуда яксола бошанд, мо танҳо алафҳои бегона ва парвардаи ба замин реша давондаи ниҳолони қулфинайро давоми сол тоза карда, зери онҳоро нарм мекунем. Нуриҳои минералӣ пошида, об медиҳем. Ҳамин тавр нуҳ моҳ дохили он меҳнат мекунем, то дар ин шабу рӯз ҳосили пурбор ба даст оварда, аз натиҷаи заҳмати худ ком ширин намоем.
Бобои Ҳамроқул мегӯяд, ки онҳо бори рӯзгорро маҳз аз даромади ҳосили қулфинай ва дигар зироати кишоварзӣ мекашанду фарзандонро низ аз ҳамин ҳисоб соҳиби хонаю дар намудаанд.
- Ин намуди меваи заминӣ камхарҷу сердаромад буда, нисбат ба дигар зироати хоҷагии қишлоқ зудтар пухта мерасад,- қайд мекунад кишоварз.
Ҳамроқул Сатторов таъкид мекунад, ки ниҳолони қулфинай ғамхории доимӣ мехоҳанд. Агар рафта каме ба он беэътиборӣ зоҳир гардад, ҳашароти гуногун зиён меорад. Намнокии зиёди зери ниҳол низ ҳосилро мепӯсонад. Ҷӯяки қулфинай бояд нисбат ба дигар зироат ҷуқуртар бошаду ниҳолон дар баландӣ ҷой гиранд.
Махсусан, дар вақти пухта расидани ҳосил асосан пас аз нисфирӯзӣ об мондан ба нафъи деҳқон хоҳад буд.
Ин деҳқонони қулфинайпарвар мегӯяд, ки баҳорон барои эшон айёми долу зарби кор аст. Чун заҳматашон самар додаю барои ҷамъоварӣ омода мешавад. Барои зарар надидану талаф наёфтани ҳосили пухтарасида, талош мекунанд рӯз то шом дар саҳро бошанд.
И. Мустафо
Добавить комментарий
Ахбор
Меҳрнома 14:10ХАТЛОН. МУСОБИҚАИ БАЙНАЛМИЛАЛӢ БАРГУЗОР МЕШАВАД 16:10КӮШОНИЁН. ТАЪМИРИ АСОСИИ БЕШ ЯК КИЛОМЕТР РОҲ 14:10КӮШОНИЁН. ДУ БИНОИ 10 ОШЁНА СОХТА МЕШАВАД 14:01МУЪМИНОБОД. БУНЁДИ 200 ИНШООТ ДАР НАҚША 13:05ҒОЛИБИЯТИ ВАРЗИШГАРИ ХАТЛОНӢ ДАР МУСОБИҚАИ БАЙНАЛМИЛАЛӢ 11:27ХАТЛОН. ВАРЗИШГАРОН БЕШ АЗ 450 МЕДАЛ БА ДАСТ ОВАРДАНД 15:42ИФТИТОҲИ МАҒОЗАИ АРМУҒОН ВА СЕХИ ДУХТИ ЛИБОСҲОИ МИЛЛӢ ДАР КӮШОНИЁН 15:08
Серхонандаҳо
Булбуле аз гулшани адаб
ИҶОБАТИ ДУОИ ПРЕЗИДЕНТ
КӮШОНИЁН. ТАЪМИРИ АСОСИИ БЕШ ЯК КИЛОМЕТР РОҲ
А. Абдусаломзода “ҲУВИЯТИ МИЛЛӢ ВА ТАРБИЯИ ВАТАНДӮСТИИ ҶАВОНОН”-РО БАЛАНД БАРДОРЕМ
“САЙРИ ГУЛИ ЛОЛА” ДАР ХАТЛОН
ХАТЛОН. МУСОБИҚАИ БАЙНАЛМИЛАЛӢ БАРГУЗОР МЕШАВАД
ИФТИТОҲИ МАҒОЗАИ АРМУҒОН ВА СЕХИ ДУХТИ ЛИБОСҲОИ МИЛЛӢ ДАР КӮШОНИЁН
Манфиат ва зарари шарбати сабзӣ
ДУОИ РАҲНАМО
САМАРАИ ГРАНТИ РАИСИ ВИЛОЯТ