Роҳҳои Ҷайҳун таъмир шуданд

  Бо ташаббуси соҳибкорон ва шахсони саховатпеша, соли гузашта бо харҷи 1 миллиону 281 ҳазор сомонӣ роҳҳои маҳаллии ноҳияи Ҷайҳун таъмиру азнавсозӣ гардиданд.
Дар ин бора раиси ноҳияи Ҷайҳун Абдулҳафиз Одиназода зимни нишасти матбуотӣ иттилоъ дод.
Ӯ гуфт, ки дар маҷмуъ 3 километр роҳ таъмири асосии асфалтпӯш, 48,6 километр сангфарш ва 14,5 километри дигар таъмири ҷорӣ гардиданд. Инчунин 3 пулу як қубур низ аз таъмир бароварда шуданд.
Дар ин баробар аз тарафи Вазорати нақлиёти мамлакат ба маблағи 244 ҳазор сомонӣ 111,2 километр роҳҳои байналмилалӣ ва 41,5 километр роҳҳои аҳамияти маҳаллидошта таъмири ҷорӣ карда шуданд.
Аз тарафи мақомоти маҳаллӣ низ 110 ҳазор сомонӣ ҷудо гардида, қисмате аз роҳҳои ҳудуди ноҳия аз таъмир бароварда шуданд.
-Дар соли равон низ ин иқдом идома ёфта, бояд зиёда аз 4 километр роҳҳои ҳудуди шаҳраки ноҳия аз таъмири асосӣ бароварда шаванд, - гуфт А. Одиназода.
 Сулаймон СУЛТОНОВ