Беш аз 1450 саг шиноснома гирифтанд

Соли гузашта дар шаҳру ноҳияҳои вилояти Хатлон ба1458 саг шиносномаи фардии ҳайвонот дода шуд, ки ин рақам дар қиёс ба соли 2021-ум 63 адад зиёд мебошад.
Ин нуқтаро зимни нишасти матбуотӣ сардори Раёсати Кумитаи бехатарии озуқаворӣ дар вилояти Хатлон Эраҷ Рауфзода зикр кард.
Номбурда афзуд, ки арзиши шиноснома шаш сомониро дар бар гирифта, ҳамасола муроҷиати сокинон перомуни ин масъала зиёд шуда истодааст. Таъмини шиноснома имкон медиҳад, ки безарар будани ҳайвоноти хонагӣ кафолат дода шавад. 
Гуфта шуд, ки  ҳамчунин соли гузашта 2 ҳазору 210 сар сагҳои дайду безарар гардонида шуданд.
Чорабинии пешгирӣ ва мубориза бар зидди бемории ҳории ҳайвоноти хонагӣ дар асоси талаботи нақша-чорабинии бар зидди ҳорӣ ба роҳ монда шуда, 12 ҳазору 311 сар саг, 16 ҳазору 405 сар чорвои калони шохдор, 7 ҳазору 742 сар чорвои майдаи шохдор, 2 ҳазору 956 сар маркаб, 130 сар асп ва 63 сар гурба бар зидди бемории ҳорӣ эмгузаронӣ карда шуданд,- гуфт Эраҷ Рауфзода.
Сулаймон СУЛТОНОВ