Қарзи барқ ба беш аз 451 миллион сомонӣ расидааст

Маблағи қарзи неруи барқ дар минтақаи Бохтари вилояти Хатлон ба беш аз 451 миллион сомонӣ расидааст, ки аз ин миқдор 121 миллиону 705 ҳазор сомонии он ба аҳолӣ рост меояд. 
Раҷабалӣ Бояков, сармуҳандиси Филиали Ҷамъияти Саҳомии “Шабакаҳои тақсимоти барқ дар шаҳри Бохтар” зимни нишасти матбуотӣ гуфт, ки дар баробари аҳолӣ ташкилоту корхонаҳои саноатӣ – 5 миллиону 271 ҳазор сомонӣ, хоҷагиҳои пахтакор – 138 миллиону 166 ҳазор сомонӣ, корхонаҳои буҷетӣ – беш аз 24 миллион сомонӣ ва идораҳои беҳдошти замин ва обёрӣ зиёда аз 44 миллион сомонӣ аз истифодаи неруи барқ қарздор мебошанд. Дар ин баробар боз ба андозаи 60 миллион сомонӣ дигар қарзҳо низ мавҷуданд. 
Гуфта шуд, ки ин қарз аз солҳои пеш омада истодааст ва ҳамасола афзоиш ёфта истодааст.
Сулаймон СУЛТОНОВ