Ошкоршавии беш 1300 килограмм антифризи бесифат

Ба саволи хабарнигори маҷаллаи “Сафо” перомуни чӣ миқдор ошкоршавии антифризи бесифат Назрулло Шарифзода, муовини Маркази Тоҷикстандарт дар вилояти Хатлон зимни нишасти матбуотӣ иброз кард, ки ба миқдори 1939 килограмм ин намуди маҳсулоти бесифат давоми соли гузашта ошкор карда шудааст. 
Ба иттилои ӯ ин миқдор моеи зиддиях аз 18 нафар соҳибкороне, ки ин гуна маҳсулоти бесифатро дар бозору мағозаҳо ба фурӯш бароварда буданд, ошкор шудааст. Нисбати ин соҳибкорон аз ҷониби мақомоти суд чораҳои дахлдор қабул карда мешавад.
Гуфта шуд, ки давоми соли 2022 аз ҷониби ҳамаи шуъбаҳои Марказ 210 санҷиш гузаронида шуда, нисбати 259 нафар соҳибкорон ва масъулини субъектҳои хоҷагидорӣ барои ба фурӯш баровардани молу маҳсулоти ғайристандартӣ, муҳлати истеъмолашон гузашта, фиреби истеъмолкунандагон, риоя накардани қоидаҳои хӯроки умумӣ, савдо ва хизматрасонӣ ба маблағи 81 ҳазору 88 сомонӣ ҷарима татбиқ карда шудааст.
Санҷишҳои гузаронидашуда, 171 ҳолат ба нуқтаҳои савдо, 17 ҳолат ба нуқтаҳои хӯроки умумӣ, 2 ҳолати санҷиши анборҳо, 18 ҳолати санҷиши нуқтаҳои фурӯши сӯзишворӣ ва 2 ҳолати санҷиши дигар ба бозорҳо рост меояд.
Инчунин соли гузашта аз ҷониби мутахассисони Марказ 135 ташхис дар бозорҳои дохилӣ гузаронида шуда, 3 ҳолати ғайристандартии маводи сӯзишворӣ ошкор шудааст. Аз ин 4550 килограмм бензин ва 7262 килограмм сӯзишвории дизелӣ мебошад. Муайян гардид, ки дар ин миқдор маҳсулоти сӯзишворӣ тамғагузорӣ нодуруст гузошта шуда будааст.
Сулаймон СУЛТОНОВ