Содироти матоъ ба хориҷи кишвар

Соли 2022 аввалин маротиба аз вилояти Хатлон ба хориҷи кишвар ба маблағи 5 миллион доллар содироти матоъ ба роҳ монда шуд,- гуфт сардори Раёсати минтақавии гумрукӣ дар вилояти Хатлон Эраҷ Ҳалимзода зимни нишасти матбуотӣ.
Ӯ афзуд, ки ин иқдом аз ҷониби ҶСП “Данғара Син – Силу Текстил” роҳандозӣ гардида, содирот ба давлатҳои Федератсияи Россия ва Туркия анҷом дода шудааст. 
Зикр гардид, ки соли гузашта аз вилояти Хатлон ба хориҷи кишвар 31 номгӯи маҳсулоти молӣ содирот карда шудааст, ки маблағи он 238,2 миллион долларро дар бар мегирад.
Дар баробари содирот, соли сипаригардида 83 номгӯи гурўҳи молӣ ба маблағи 260 миллион доллар аз хориҷи кишвар ба вилояти Хатлон ворид гаштааст. 
Ба иттилои Эраҷ Ҳалимзода соли 2022 сарҳади гумрукии вилояти Хатлонро 602 ҳазору 932 нафар шаҳрвандон убур кардаанд, ки ин нишондод, дар қиёс ба ҳамин давраи соли 2021-ум 282 ҳазору 393 нафар зиёд мебошад.
Соли гузашта дар воҳидҳои тобеи Раёсат 128 ҳолати қонуншиканӣ ба қайд гирифта шудааст, ки аз ин шумора 7 адад ҳолати ҷиноят ва 121 адад ҳуқуқвайронкуниҳои маъмурӣ дар соҳаи гумрук мебошад. Дар асоси парвандаҳои ҳуқуқвайронкунии маъмурии оғозкардашуда, ба маблағи 314 ҳазору 992 сомонӣ ҷарима ситонида шудааст. Парвандаҳои оғозшуда ба 69 нафар шахсони воқеӣ ва 52 нафар шахсони ҳуқуқӣ тааллуқ доранд.
Сулаймони СУЛТОНОВ