Бунёди 166 иншоот дар нақша

То ҷашни 35 – солагии Истиқлолияти давлатии Ҷумҳурии Тоҷикистон дар ноҳияи Ҷалолиддини Балхӣ бунёди 166 иншооти таъйиноти гуногун ба нақша гирифта шудааст.
Ба иттилои мутахассиси пешбари бахши меъморӣ ва шаҳрсозии Мақомоти иҷроияи ҳокимияти давлатии ноҳияи болозикр Саид Шукуров, аллакай, соли 2022, аз ҷамъи умумии иншооти ба нақшагирифташуда, 32 адади он мавриди баҳрабардорӣ қарор дода шуд, ки дар онҳо беш аз 60 нафар сокинони маҳаллӣ бо ҷойи кори доимию мавсимӣ ва маоши хуб таъмин гаштанд.
Боз дар зиёда аз 20 иншооти дигар корҳои сохтмонӣ босуръат идома доранд, ки марҳила ба марҳила сохта ба истифода дода мешаванд. 
Дар бунёди иншооти гуногун саҳми соҳибкорони маҳаллӣ назаррас буда, қисмати зиёди ин иншоот аз ҳисоби онҳо сохта шуда истодааст.
Аз ҷумла, бо ташаббуси соҳибкори маҳаллӣ дар деҳаи Чорбоғи Ҷамоати деҳоти Навобод бо харҷи 630 ҳазор сомонӣ бунгоҳии тиббии замонавии дорои шаш утоқи барҳавои корӣ бо тамоми таҷҳизоти зарурӣ сохта ба истифода дода шуд.
Сокинони меҳнатқарини ноҳияи Ҷалолиддини Балхӣ тамоми кӯшишу ғайрати хешро баҳри он равона намуда истодаанд, ки ҷашни пурифтихори 35 – солагии Истиқлолияти давлатии кишварро бо дастовардҳои назаррас истиқбол намоянд, - гуфт Саид Шукуров.
Сулаймони ДАВЛАТ