Наҷоти парандаҳо аз сардӣ

Ба хотири эмин мондани парандаҳо аз сармо, сокини шаҳри Левакант Иззатуллои Муродалӣ гармхонаи хешро ҳамчун паноҳгоҳи муваққатӣ барои онҳо кардааст. 
Ӯ дар ин гармхона беш аз 1000 парандаро ҷо карда, ҳамарӯза барои онҳо обу дон медиҳад. 
Иззатуллои Муродалӣ зимни суҳбат иброз кард, ки дар ин сармои шадид аксари парандаҳо ба хунукӣ тоб наоварда ҷон бохтанд ва аз ин сабаб ин иқдом роҳандозӣ карда шуд.
Тамоми хароҷоти нигоҳубини ин парандаҳо аз ҳисоби шахсии ӯ сурат мегирад. Дар ин кори нек ҳамсояҳо низ ба ӯ кумак мерасонанд, ва аз ҳар ҷо парандаҳои аз сардӣ ба замин афтодаро оварда дар ин гармхона сар медиҳанд.
Ба гуфтаи ин ҷавони хайрхоҳ баъди  ба поён расидани сардиҳои шадид ҳамаи ин парандаҳо озод карда мешаванд. 
Иқдоми роҳандозӣ кардаи ин ҷавон намунаи ибрат буда, боиси зинда мондани ҳазорҳо паранда дар ин сармои шадид гаштааст.
С. СУЛТОН