19 янв 10:49Ахбор / Иҷтимоъ / Маърифат ва тандурустӣ

Роҳандозии 25 намуди амалиёти ҷарроҳии нав

Соли 2022 дар муассисаҳои тандурустии вилояти Хатлон 25 намуди амалиёти нави ҷарроҳӣ дар самти ворид намудани усулҳои нав гузаронида шудааст. Инҳо ҷарроҳиҳое мебошанд, ки нахустин бор дар қаламрави вилоят ба роҳ монда шудаанд.
Дар ин бора Маркази матбуотии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар додааст.
Манбаъ зикр кардааст, ки дар Беморхонаи клиникии бисёрсоҳавии ба номи А. Ҳақназарови шаҳри Кӯлоб усули нави ҷарроҳии найчагузории маҷроҳои талхагузар, кистаҳои солитарии ҷигар, гурда ва узвҳои занона таҳти назорати дастгоҳи ташхисии фаросавтӣ ба роҳ монда шуда, инчунин дар беморхонаи мазкур амалиёти ҷарроҳии бурида гирифтани думи ғадуди зери меъда бо киста гузаронида шудааст.
Дар Беморхонаи клиникии вилоятии ба номи Бурӣ Воҳидови шаҳри Бохтар низ ба беморон бо ташхиси “тангшавии роҳҳои пешобрав” амалиёти ҷарроҳии “ретеропластикаи аугментатсионӣ” бо истифодабарии пардаи луобии лунҷ, амалиёти ҷарроҳии “эхинококози шушҳо” бо усули торакоскопӣ тариқи видеоассистентӣ ва ҷарроҳии тармимӣ дар суфраи гӯш ба роҳ монда шуд.
Ба иттилои манбаъ дар давраи сипаригашта дар Маркази ҷарроҳии вилоятӣ амалиёти ҷарроҳии “Краниотомияи устухони пушти сар аз чап бо гирифтани омоси дохилимағзии кистозиву солидии ҳиссаи пушти майнаи сар аз чап”, амалиёти ҷарроҳии “Краниотомияи устухони фарқу пешонаву чакка аз чап бо гирифтани омоси дохилимағзии ҳиссаҳои фарқу пешона аз чап”, амалиёти ҷарроҳии “Краниотомияи устуҳони фарқу чаккаи сар аз ду тараф, бисёртар аз тарафи чап бо гирифтани омоси сеяки мобайнии синуси сагиталии майнаи сар аз чап”, амалиёти ҷарроҳии “Ламинэктомияи муҳраҳои С4-С5-С6-С7 бо гирифтани омоси интрадуралии ҳароммағз” ва ғайра муваффақона сурат гирифтааст.
Дар Беморхонаи марказии ноҳияи Фархор низ ба воситаи дастгоҳи ташхиси фаросавтӣ гузоштани нефростома ба кистаҳои гурдаҳо ба роҳ монда шудааст.
С. СУЛТОНОВ

Похожие новости:

Добавить комментарий