Нуқтаи тиббӣ барои зарардидагон

Бо ташаббуси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ва Созмони умумиҷаҳонии тандурустӣ дар Ҷамоати деҳоти Золи зари ноҳияи Ҷалолиддини Балхӣ маркази ҷойгирии муваққатии паноҳандагони эҳтимолӣ ва онҳое, ки бар асари офатҳои табиӣ зарар дидаанд, нуқтаи тиббӣ мавриди баҳрабардорӣ қарор дода шуд. 
Дар ин бора роҳбари дастгоҳи раиси ноҳияи Ҷалолиддини Балхӣ Баҳром Исоев ба “Сафо” иттилоъ дод.
Номбурда гуфт, ки ин нуқтаи тиббӣ дар доираи ҳамкории байналмилалии Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон бо шарикони рушд дар самти коҳиши хатари офатҳо сохта шуда, имкон медиҳад дар сурати сар задани офати табиӣ ё дигар ҳолатҳои фавқулода тақрибан 100 оилаи аз манзил ва амволи худ маҳрумшуда бо ашёи зарурӣ, аз қабили хайма дорухонаи шахсӣ, зарфҳои об, бастаҳои беҳдоштӣ, болишту кӯрпа ва маҷмааҳои ошхонаӣ таъмин бошанд. 
Дар маросими ифтитоҳи ин нуқтаи тиббӣ муовини аввали Раиси  Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Ҳотамшо Латифзода ва намояндаи Созмони умумиҷаҳонии тандурустӣ таҳти раёсати Департаменти дастгирии кишварҳо, омодагӣ ва вокуниш ба ҳолатҳои фавқулодаи Дафтари аврупоии Созмони умумиҷаҳонии тандурустӣ Гундо Уэйлер иштирок намуданд.
Сулаймон СУЛТОНОВ